{"id":9492,"date":"2013-01-03T22:02:53","date_gmt":"2013-01-03T21:02:53","guid":{"rendered":"https:\/\/www.gioventurapiemonteisa.net\/2020\/?p=9492"},"modified":"2013-01-03T22:02:53","modified_gmt":"2013-01-03T21:02:53","slug":"da-je-statut-ed-lospissi-dla-soceta-d-san-giors-del-popol-ed-cher","status":"publish","type":"post","link":"https:\/\/www.gioventurapiemonteisa.net\/2020\/?p=9492","title":{"rendered":"Da j\u00eb \u00abStatut \u00ebd l\u2019Ospissi dla Societ\u00e0 \u2018d San Gi\u00f2rs d\u00ebl p\u00f2pol \u00ebd Ch\u00e9r\u00bb (1321)"},"content":{"rendered":"

Ij test \u00ebd Ch\u00e9r a l\u2019\u00e9 \u2018l document an piemont\u00e8is \u00ebl p\u00ec antich ch\u2019a p\u00f2rta na datassion precisa. I soma ant l\u2019\u00e9poca dle Comun-e e \u2018d soe l\u00f2te p\u00ebr goern\u00e9 soe libert\u00e0. Ch\u00e9r a l\u2019\u00e9 na rep\u00f9blica, antagonista a Turin, ch\u2019a restr\u00e0 indipendenta fin-a al 1347, cand a sar\u00e0 pij\u00e0 dai Cont \u00ebd Sav\u00f2ja.<\/span><\/span><\/em><\/p>\n

\u00abAnt la Comun-a \u2018d Ch\u00e9r la societ\u00e0 \u2018d San Gi\u00f2rs a rapresentava \u2018l part\u00ec popolar, e l\u2019ospissi a l\u2019era la rocaf\u00f2rt andova j\u2019\u00f2m \u00ebd la Societ\u00e0 a s\u00eb riun\u00eco p\u00ebr deliber\u00e9 e, ant l\u2019ocasion, p\u00ebr difendse contra la Societ\u00e0 dij milissian o cola dij Cavajer, ch\u2019a j\u2019ero form\u00e0 dai n\u00f2bij\u00bb (Pinin Pac\u00f2t).<\/span><\/span><\/em><\/p>\n

L\u2019amportansa \u2018d costi test, ch\u2019a son peui ij test ufissiaj \u00ebd la costitussion \u00ebd la Compan\u00eca, a l\u2019\u00e9 dzortut lingu\u00ecstica: oltra a dene na testimoniansa d\u00ebl piemont\u00e8is d\u00ebl T\u00ebrzent an dan la preuva che costa lenga as dovrava \u2018dc\u00f2 an forma ufissial e formal p\u00ebr la redassion \u00ebd test giur\u00ecdich. (R.C.<\/strong><\/a>)<\/span><\/span><\/em><\/p>\n

.<\/span><\/p>\n

Statut de l\u2019Hospi\u00e7ii de la Compagnia de Saint Ge\u00f2r\u00e7<\/span><\/strong>
\ndel p\u00f2vol de Cher<\/span><\/strong>
\n23 \u2018d luj d\u00ebl 1321<\/span><\/strong><\/p>\n

A lo n\u00f2m del n\u00f2str segnor Ies\u00f9 Christ, <\/span>amen<\/em>. A l\u2019an de la ssoa nativit\u00e0 mcccxxi, a la quarta indi\u00e7ion, en saba a xxv di del meis de loign en lo pien e general consegl de la compagnia de messer saint Ge\u00f2r\u00e7 de Cher, a son de ca<\/span>m<\/em>panna e a vox de crior, en la chaxa de lo dit comun de cher al mod<\/span>1<\/sup> ux\u00e0 e congreg\u00e0:<\/span><\/p>\n

el fu statu\u00ec e ordon\u00e0 per col consegl e per gle consegler de lo dit consegl e per<\/em> gle rezior de la dicta compagnia, gle qual adonch l\u00ec eren en granda quantit\u00e0 e gniun de lor discrepant, fait apres solempn part\u00ec, <\/span><\/span><\/p>\n

che gly infrascri<\/em>pt quatr\u00e7ent h\u00f2megn de la ditta com<\/em>pagnia seen e debien esser perpetuarmeint e se debien nominer un hospi\u00e7ii, \u00e7o \u00e8 hospi\u00e7ii de la compagnia de sein Ge\u00f2r\u00e7.<\/span><\/span><\/p>\n

I quagl h\u00f2megn debien e seen entegn\u00f9 perpetuarmeint consegler a adrit e learmeint la ditta compagnia e i c\u00f2nsol e gli h\u00f2megn de colla compagnia a bona fay, no declinand a alcun<\/em>na volunt\u00e0 se n\u00f2 a chun<\/em>na utilit\u00e0 del c\u00f2rp de colla compagnia. <\/span><\/span><\/p>\n

E se el entrevenis, que Dee n\u2019el vogla<\/span>2<\/sup>, que alchuna persona que ne fus de la ditta compagnia, de qui<\/span>n<\/em>ta condi\u00e7io<\/span>n<\/em> o stat que sea, feris alchu<\/span>n<\/em> h\u00f2m de la ditta compagnia o veirament feis ferir o vulnerer \u2013 o veirame<\/span>n<\/em>t fos a fer la ditta ferua o veirament deis consegl vo favor \u2013 o se el entrevenis de houre enai<\/span>n<\/em>t que alchu<\/span>n<\/em> de la dita compagnia feris o vulneras alchun o alchuign qui no fossen de la ditta compagnia o com chol o veyrame<\/span>n<\/em>t prandes guera com lor,<\/span><\/p>\n

que gle infrascri<\/em>pt quatr\u00e7ent h\u00f2megn de la ditta compagnia seen entegn\u00f9 e debien pre\u00e7ixamen<\/em>t e sen\u00e7a tenor porter e deferir pareysament arme, \u00e7o \u00e8 falchastr, juxerma o sea spa o ma\u00e7a, e bra\u00e7agl o sea tavola\u00e7a, tant quant porterea col o coigl de la ditta compagnia i quagl havess<\/em>en o aves la ditta disc\u00f2rdia e tant que la vindita se feis de la ditta ferua,<\/span><\/span><\/p>\n

de fin\u00b7a tant que col qui area la disc\u00f2rdia o a chy serea faita la ditta ferua o qui ferea la ditta vendita a pas o sea conc\u00f2rdia pervenis con y s\u00f2y auersarii:<\/span><\/span><\/p>\n

………………….<\/span><\/span><\/p>\n

(Da C. Salvioni,<\/em><\/span> Antichi testi dialettali chieresi<\/span>, an \u201cMiscell. Caix-Canello \u201d, Firenze 1886; G.P. Clivio, <\/em><\/span>Coj \u2018d San Gi\u00f2rs: a prop\u00f2sit d\u00ebl prim document \u00ebd vej piemont\u00e8is ch\u2019a sia dat\u00e0bil e localis\u00e0bil<\/span>, an V R\u00ebscontr Ant\u00ebrnassional d\u00eb Studi an sla Lenga e la Literatura Piemont\u00e8isa – 1988, At, Alba 1989).<\/em><\/span><\/span><\/span><\/p>\n

Version an piemont\u00e8is modern \u00ebd Renata Capello<\/em><\/p>\n

<\/em>Al N\u00f2m \u00ebd n\u00f2str S\u00ebgnor Ges\u00f9 Crist. Amen. Ant l\u2019ann \u00ebd Soa Nativit\u00e0 1321, ant la quarta indission, an saba d\u00ebl di ch\u2019a f\u00e0 25 d\u00ebl m\u00e8is \u00ebd luj, ant \u00ebl pien e general Cons\u00e8j \u00ebd la Compan\u00eca \u2018d Sor San Gi\u00f2rs \u00ebd Ch\u00e9r, a son \u00ebd ci\u00f2ca e a vos \u00ebd crior ant la ca dla dita Comun-a \u2018d Ch\u00e9r al meud dovr\u00e0 e congreg\u00e0,<\/span><\/p>\n

a l\u2019\u00e9 stabilisse e ordinasse da col Cons\u00e8j e dai Consij\u00e9 d\u00ebl dit Cons\u00e8j e dai Resior \u00ebd la dita Compan\u00eca, che adonch a-i ero l\u00ec an gran n\u00f9mer e gnun \u00ebd lor a l\u2019era an dzac\u00f2rdi, f\u00e0it apress n\u2019esam ancreus,<\/span><\/p>\n

che ij sot\u00ebscrit quatsent \u00f2m \u00ebd la dita Compan\u00eca a sio e a d\u00ebbio esse an manera perpetua e a debio costituisse an \u00abospissi\u00bb e pij\u00e9 \u2018l n\u00f2m \u00ebd \u00abCompan\u00eca \u2018d San Gi\u00f2rs\u00bb,<\/span><\/p>\n

che che costi \u00f2m a debio e a sio tn\u00f9 an manera perpetua a d\u00e9 \u2018d bon cons\u00e8j e an manera s-c\u00ebtta a la dita Compan\u00eca e ai C\u00f2nsoj e a j\u2019\u00f2m \u00ebd cola Compan\u00eca an bon-a fe\u2019, nen sogetand-se a gnun-a volont\u00e0 ch\u2019a sia pa p\u00ebr ch\u00e8ich utilit\u00e0 d\u00ebl c\u00f2rp <\/span><\/span>(dla bin)<\/em><\/span><\/span> \u00ebd cola Compan\u00eca.<\/span><\/span><\/p>\n

E s\u2019a ant\u00ebrv\u00ebn\u00e8issa, che De a veuja pa, che ch\u00e8ich p\u00ebrson-a ch\u2019a f\u00e0 pa part \u00ebd la dita Compan\u00eca – \u00ebd quals\u00ebss\u00eca condission o stat ch\u2019a sia, a feri\u00e8issa cheidun \u00ebd la dita Compan\u00eca o a f\u00e8issa fer\u00ec o daneg\u00e9 o vreman a fussa chiel a f\u00e9 la dita fer\u00eca o bele mach a d\u00e8issa cons\u00e8j o a favori\u00e8issa o se cheidun \u00ebd f\u00f2ra a ant\u00ebrven\u00e8issa dnans che cheidun \u00ebd la dita Compan\u00eca a feri\u00e8issa o a daneg\u00e8issa] cheidun ch\u2019a fusso nen \u00ebd la dita Compan\u00eca, o con col ch\u2019a-j f\u00e8issa gu\u00e8ra<\/span><\/p>\n

che ij sot\u00ebscrit quatsent \u00f2m \u00ebd la dita Compan\u00eca a sio tn\u00f9 e a d\u00ebbio ampressa e sensa spet\u00e9 pij\u00e9 e port\u00e9 d\u2019arme, visad\u00ec falsastr, giusarma o sp\u00e8ja o massa e brassal o taulassa, tant com a port\u00e8issa col o coj \u00ebd la dita Compan\u00eca ch\u2019a l\u2019av\u00e8isso av\u00f9 o a l\u2019av\u00e8isso dita d\u00ebsc\u00f2rdia e tant che la vend\u00ebtta as f\u00e8issa dla dita of\u00e8isa<\/span><\/p>\n

fin-a a cand che col ch\u2019a l\u2019av\u00e8issa la d\u00ebsc\u00f2rdia o ch\u2019a l\u2019av\u00e8isso faje la dita of\u00e8isa o a f\u00e8issa la dita vend\u00ebtta, a pas, visad\u00ec a conc\u00f2rdia a vn\u00e8issa nen con ij s\u00f2 aversari:<\/span>\u00a0<\/span><\/p>\n

……………………<\/span><\/span>\u00a0<\/span><\/p>\n