{"id":24542,"date":"2013-12-28T23:31:32","date_gmt":"2013-12-28T22:31:32","guid":{"rendered":"https:\/\/www.gioventurapiemonteisa.net\/2020\/?p=24542"},"modified":"2013-12-28T23:31:32","modified_gmt":"2013-12-28T22:31:32","slug":"la-bela-carolin-carolin-a-d-savoja","status":"publish","type":"post","link":"https:\/\/www.gioventurapiemonteisa.net\/2020\/?p=24542","title":{"rendered":"La bela Carolin (Carolin-a 'd Sav\u00f2ja)"},"content":{"rendered":"
\"\"
La bela Carolin
Carolin-a ‘d Sav\u00f2ja
(Turin 1764 – Dresda 1782)<\/figcaption><\/figure>\n
Costa balada a conta la st\u00f2ria vera dla prins\u00ebssa Maria Carolin-a Antonieta Adl\u00e0ida ‘d Sav\u00f2ja (1764-1782), la dariera\u00a0<\/span>dle fije d\u00ebl r\u00e8 Vit\u00f2rio Amed\u00e9 III (e seure ‘d Carl Emanu\u00e9l IV, \u00ebd Vit\u00f2rio Emanu\u00e9l I e ‘d Carl Flis).<\/span><\/div>\n

A la fij\u00ebtta a-j pias\u00eca st\u00e9 a Turin, andova che la gent a j’ero tant afession\u00e0 a chila, ma le sircostanse a l’av\u00eco amponuje d’and\u00e9 sposa al prinsi eletor \u00ebd Sass\u00f2nia\u00a0Anton Clemens, ch’a duv\u00eca peui \u00ebvn\u00ec r\u00e8 ‘d Sass\u00f2nia. La prins\u00ebssa, ch’a l’av\u00eca mach disset agn, a l’era nen d’ac\u00f2rde ‘d chit\u00e9 ‘l Piemont, ma d\u00eb stracheur\u00a0a l’av\u00eca dov\u00f9 sogetesse a la rason d’\u00ebstat.<\/span><\/span><\/p>\n

\u00cbl mariage p\u00ebr procura a l’era selebrasse al castel \u00ebd Moncal\u00e9 ai 29 d\u00eb st\u00e8mber d\u00ebl 1781. La matin d\u00f2p la famija real a l’av\u00eca defil\u00e0 arlongh le contr\u00e0 ‘d Turin, dc\u00f2 p\u00ebr content\u00e9 la gent ch’a vor\u00eco v\u00ebdde ancor na vira soa cara prins\u00ebssa ch’as n’andas\u00eca via. \u00cbl r\u00e8 e l’argin-a, con \u00ebl prinsi e la prins\u00ebssa ‘d Piemont, a l’av\u00eco peui vorsula compagn\u00e9 fin-a V\u00ebrsej; da l\u00ec, d\u00f2p j’\u00f9ltim salut, \u00ebl cortege ch’a compagnava “la bela Carolin” a l’av\u00eca seguit\u00e0 p\u00ebr Dresda.<\/span><\/p>\n

S\u00f2 sogiorn alman a dov\u00eca nen dur\u00e9 v\u00e0ire: a l’era pen-a passaje n’ann ch’a l’\u00e9 vn\u00f9ita malavia dle vair\u00f2le e an gnanca qu\u00ecndes di a l’\u00e9 and\u00e0ita a la tomba, ai 28 d\u00eb dz\u00e8mber d\u00ebl 1782.\u00a0<\/span>A smija che, malgr\u00e9 t\u00f9it j’\u00ebsf\u00f2rs \u00ebd la cort \u00ebd Sass\u00f2nia, la prins\u00ebssa a fussa sempe malinconiosa e ch’a pati\u00e8issa ‘l mal d\u00ebl Pais \u00ebd Piemont.<\/span><\/p>\n

L’an\u00f2nim torototela a d\u00ebv av\u00e8j compon\u00f9 la canson giusta apress la neuva dla fin \u00ebd Carolin-a, arcordand s\u00f2 cortege p\u00ebr Turin \u00ebd l’ann andarera, s\u00f2 viage fin-a V\u00ebrsej con soa cugn\u00e0 Clotilde, j’adieu a soa famija e soa ideja che giumai a j’avr\u00eca torna v\u00ebduje t\u00f9it mach an Paradis. Na balada arnosa ch’a l’\u00e9 riv\u00e0 fin-a ai n\u00f2stri di e che, com a l’ha scriv\u00f9 Costantino Nigra (ch’a l’ha publicala ‘l prim d\u00ebl 1862) \u00abfa fede della bont\u00e0 di cuore e del sentimento di antica lealt\u00e0 del popolo piemontese\u00bb.<\/em><\/span><\/p>\n

\u00a0.<\/span><\/p>\n

LA BELA CAROLIN<\/span><\/p>\n

La bela Carolin la veulo marid\u00e9,<\/span>
\nlo duca d\u00eb Sass\u00f2nia a-j veulo f\u00e9 spos\u00e9.<\/span>
\n– \u00d2h s’a me bin p\u00ec car un p\u00f2ver paisan<\/span>
\nche ‘l duca d\u00eb Sass\u00f2nia ch’a l’\u00e9 tan lontan.<\/span>
\n\u00a0<\/span>
\n– Un p\u00f2ver paisan l’\u00e9 pa d\u00ebl v\u00f2st onor,<\/span>
\nlo duca d\u00eb Sass\u00f2nia ch’a l’\u00e9 ‘n gran signor.<\/span>
\n– \u00d2h s’a me bin p\u00ec car un cavajer dla cort<\/span>
\nche ‘l duca d\u00eb Sass\u00f2nia ch’a l’\u00e9 ‘n gran signor.<\/span>
\n\u00a0<\/span>
\n– Un cavajer dla cort l’\u00e9 pa d\u00ebl v\u00f2st onor,<\/span>
\nlo duca d\u00eb Sass\u00f2nia ch’a l’\u00e9 ‘n gran signor.<\/span>
\n– Da gi\u00e0 ch’a l’\u00e9 cos\u00ec, da gi\u00e0 ch’a l’\u00e9 destin,<\/span>
\nfaroma la girada tut antorn ‘d Turin.<\/span>
\n\u00a0<\/span>
\n– Bond\u00ec, m\u00e8 car pap\u00e0, bond\u00ec cara maman,<\/span>
\nche mi vad an Sass\u00f2nia ch’a l’\u00e9 tan lontan.<\/span>
\n– Cara la mia cugn\u00e0, p\u00ebrch\u00e9 na piori tan?<\/span>
\nMi son ven\u00f9a da ‘n Fransa ch’a l’\u00e9 tan lontan.<\/span>
\n\u00a0<\/span>
\n– Cara la mia cugn\u00e0 voi s\u00ec ven\u00f9a a Turin<\/span>
\na casa dij Sav\u00f2ja ch’a l’\u00e9 ‘n bel giardin!<\/span>
\nCara la mia cugn\u00e0, tocheme ‘n p\u00f2 la man,<\/span>
\ncola ch’iv arcomand s’a l’\u00e9 la mia maman.<\/span>
\n\u00a0<\/span>
\nQuand a n’in son riv\u00e0 s\u00ebl pont d\u00eb l\u00e0 ‘d V\u00ebrsej,<\/span>
\nna f\u00e0 la dispart\u00eca con ij s\u00f2 fratej.<\/span>
\n– Fratej dij m\u00e8 fratej, tocheme ‘n p\u00f2 la man,<\/span>
\nche mi vad an Sass\u00f2nia ch’a l’\u00e9 tan lontan.<\/span>
\n\u00a0<\/span>
\nTocheme ‘n p\u00f2 la man, amis, m\u00e8 car amis<\/span>
\nl’\u00e9 con la fior d\u00ebl liri arv\u00ebdse an Paradis.<\/span><\/p>\n

Lession \u00ebd la Colin-a ‘d Turin<\/h5>\n

.<\/span><\/p>\n

\u00a0La p\u00ec neuva version \u00ebd \u00abLa bela Carolin\u00bb esegu\u00eca dai\u00a0<\/span>Detaran<\/strong><\/a> d\u00ebl 2013\u00a0<\/span>\u25bc<\/span><\/p>\n