\n
La polastrin-a rossa<\/strong> \n \u00ab<\/em>Na v\u00f2lta a-i era na polastrin-a rossa ch\u2019a viv\u00eca tuta sola ant soa cas\u00f2ta vzin-a al b\u00f2sch. Na volp veja e furba a stas\u00eca nen lontan-a da l\u00e0… ma i m\u00eb scote, farinele?…\u00bb.<\/span> Ij Brand\u00e9, Armanach \u00ebd Poes\u00eca Piemont\u00e8isa<\/span><\/p>\n \n
\nMaris\u00f2t<\/strong><\/p>\n
\n\u00abSi. Bela, si… ma… e peui?\u00bb.<\/span>
\nLa Bela a l\u2019era na cara vej\u00f2ta ch\u2019a stas\u00eca davzin a ca n\u00f2stra. Forse a l\u2019av\u00eca sent ani… o magara anche \u2018d p\u00ec.<\/span>
\nS\u00f2 n\u00f2m ver a l\u2019era \u201cBorela\u201d, ma mia sorlin-a (tre ani nen comp\u00ec) a la ciamava \u201cBela\u201d, p\u00ebrch\u00e8 a l\u2019av\u00eca ancor nen pij\u00e0 famijarit\u00e0 con la \u201c<\/span>erre<\/em>\u201d. E anche p\u00ebr mi (ses ani) cola cara vej\u00f2ta a l\u2019era \u201cla Bela\u201d.<\/span>
\nMincatant, s\u00f9bit d\u00f2p disn\u00e9, al p\u00f2st d\u2019arposesse \u2018n p\u00f2 ant s\u00ebl sof\u00e0, noj\u00e0utre doe i surt\u00eco ant \u00ebl giardin e, man ant la man, i cor\u00eco l\u00e0 andoa ch\u2019a-i era la veja scala \u2018d b\u00f2sch ch\u2019a portava su ant l\u00eb studi \u2018d pap\u00e0.<\/span>
\nJ\u00eb scalin a l\u2019ero pit\u00f2st \u00e0ut e mia sorlin-a a fatigava a monteje, ma a l\u2019av\u00eca ampar\u00e0 a and\u00e9 su a \u201cgatagn\u00e0u\u201d e mi i la giutava \u2018dc\u00f2 con la vos: \u00absu… su… su… brava!\u00bb.<\/span>
\nAn bastava f\u00e9 quatr \u00ebscalin p\u00ebr trovesse ant col che p\u00ebr noi a l\u2019era l\u00eb \u201cscalin m\u00e0gich\u201d. Gi\u00e0, p\u00ebrch\u00e8 a l\u2019av\u00eca na ch\u00ebrpura larga doi d\u00ecj e longa doe branche, ch\u2019an p\u00ebrm\u00ebtt\u00eca \u2018d v\u00ebdde un mond bin divers dal n\u00f2str e bel \u2018me na f\u00e0ula.<\/span>
\nAs capiss che la posission p\u00ebr osservelo a l\u2019era nen \u00ebd le p\u00ec confort\u00e8ivole: an tocava anginojesse ant sl\u00eb scalin p\u00ec sota e chin\u00e9 la testa fin-a a la… ch\u00ebrpura m\u00e0gica; ma noj\u00e0utre i soportavo sto d\u00ebsc\u00f2mod p\u00ebrch\u00e8 a val\u00eca bin la pen-a…<\/span>
\n\u00abBela… Bela… conta la polatlin-a lossa…\u00bb a dis\u00eca mia sorlin-a con na vos gi\u00e0 un p\u00f2 andurm\u00eca.<\/span>
\n\u00abMa a st\u2019ora i duvr\u00ece gi\u00e0 sav\u00e8jla a mem\u00f2ria, birichin-e. I l\u2019avrai gi\u00e0 contavla vint v\u00f2lte…\u00bb. E forse a l\u2019av\u00eca rason.<\/span>
\nMa i penso che, p\u00ec che tut, a mia sorela a-j fas\u00eca pias\u00ec a scot\u00e9 cola vos tranquila, dossa, ch\u2019a la cunava fin-a a fela andurm\u00ec ad\u00f2ss a mi.<\/span>
\nA mi che p\u00ebr un p\u00f2 i scotava la conta, ma i rivava mai a \u2018ndeje dapress fin-a a la ciusa. P\u00ec che la f\u00e0ula, am ten\u00eca d\u00ebsvija l\u00f2n ch\u2019i pod\u00eca s-ciair\u00e9 da la \u201cch\u00ebrpura m\u00e0gica\u201d.<\/span>
\nA j\u2019ero a peupres sempe j\u2019istesse c\u00f2se, ma mi i-j god\u00eca come se i-j ved\u00e8issa p\u00ebr la prima v\u00f2lta. La \u201cBela\u201d a l\u2019era set\u00e0 an sl\u00eb scalin \u00ebd soa p\u00f2rta. A fas\u00eca causs\u00e8t e as sent\u00eca \u2018l dindin\u00e9 dij fer che a s\u2019ancrosiavo e mincatant, an sla f\u00f2ga d\u00ebl discors, un fer a j\u00eb scapava p\u00ebr t\u00e8ra e chila a crijava \u201cB\u00f2ja f\u00e0uss!…\u201d cos\u00ec f\u00f2rt che \u2018l micio, quaci\u00e0 ai s\u00f2 p\u00e9, a scapava via. I l\u2019av\u00eco amprend\u00f9 \u2018dc\u00f2 noi cola espression, e pap\u00e0 e mama an rusavo: an dis\u00eco ch\u2019a l\u2019era un p\u00f2 grossera…<\/span>
\nE antant, mentre che ij causs\u00e8t \u00ebd lan-a e la \u201cpolastrin-a rossa\u201d a andas\u00eco anans, ij m\u00e8 euj curios a spass\u00ebgiavo ant l\u2019\u00e8ira \u2018d Bela.<\/span>
\nN\u2019\u00e8ira ch\u2019a l\u2019era la fin d\u00ebl mond!…<\/span>
\nTut un bog\u00e9 \u2018d besti\u00f2le; tut un ciaraml\u00e9 \u2018d vos ch\u2019as confond\u00eco tra \u2018d lor ant un\u2019orchestra \u2018d sent \u00ebstrument. P\u00f2vra Bela! Chi a t\u00eb scotava ancora? Le pole a bech\u00ebttavo sensa sosta la t\u00e8ra e mincatant as das\u00eco bataja p\u00ebr esse le prime a pij\u00e9 na b\u00f2ja o n\u00eb smens o na gran-a \u2018d melia. E am pias\u00eca v\u00ebddje dindan\u00e9 an sle pi\u00f2te ch\u2019a smijavo a la veja Marcolin-a quand ch\u2019andas\u00eca a f\u00e9 la sp\u00e8isa.<\/span>
\nE \u2018l gal! Che bl\u00ebssa \u2018d color e quante arie as das\u00eca, convint \u00ebd soa maestosit\u00e0 e \u2018d soa amportansa. E ij cunij con j\u2019orije a pendojon a sautavo s\u00ec e l\u00e0 ant la cunijera, mentre \u2018l breugg \u00ebd le vache a vnis\u00eca f\u00f2ra da la stala e \u2018l can a baulava, i sai nen se p\u00ebr feje chit\u00e9 o p\u00ebr deje \u2018l rendicont \u00ebd la giorn\u00e0…<\/span>
\nTra tute coste creature pien-e \u2018d vita e \u2018d bl\u00ebssa a-i mancava mach… la \u201cpolastrin-a rossa\u201d. Gi\u00e0! a l\u2019era ancora an sij l\u00e0ver \u00ebd la veja Borela, ch\u2019a continuava soa st\u00f2ria con santa passiensa.<\/span>
\nNa st\u00f2ria bela, a peul desse, ma nen coma cola ch\u2019as d\u00ebsrolava d\u00ebdnans a noj\u00e0utre doe, a travers a la ch\u00ebrpura dl\u00eb scalin \u201cm\u00e0gich\u201d \u00ebd na scala \u2018d b\u00f2sch.<\/span><\/p>\n