{"id":18396,"date":"2014-06-06T00:01:00","date_gmt":"2014-06-05T22:01:00","guid":{"rendered":"https:\/\/www.gioventurapiemonteisa.net\/2020\/?p=18396"},"modified":"2018-06-26T19:27:56","modified_gmt":"2018-06-26T17:27:56","slug":"tito-livido","status":"publish","type":"post","link":"https:\/\/www.gioventurapiemonteisa.net\/2020\/?p=18396","title":{"rendered":"Sentenare dla m\u00f2rt d\u00ebl poeta boh\u00e9mien piemont\u00e8is Gioann Gastald (Tito L\u00ecvido)"},"content":{"rendered":"

Ai 3 ‘d giugn a l’\u00e9 st\u00e0it 100 ane giust ch’a l’\u00e9 mortje, a gnanca sinquant’ane, \u00ebl poeta piemont\u00e8is Gioann Gastald (Tito L\u00ecvido) – l’Autor \u00ebd “Turin-Cavoret an autom\u00f2bil”.<\/span><\/strong>
\nBele con tre di d’artard i l’oma ‘l pias\u00ec l’arcordelo noi, da gi\u00e0 che la sit\u00e0 ‘d Turin a l’\u00e9 tr\u00f2p angagi\u00e0 a trasformesse ant n’\u00e0utra r\u00f2ba.<\/span><\/strong><\/p>\n

Artista boh\u00e9mien, a l’\u00e9 st\u00e0it l’\u00e0nima d\u00ebsbela d\u00ebl prim\u00a0<\/span>Birichin<\/em>, arvista piemont\u00e8isa ch’a l’ha dirigi\u00f9 dal 1896.<\/span>
\nA l’era n\u00e0 d\u00ebl 1865 a Girgenti da na famija piemont\u00e8isa arnom\u00e0, e a l’era torn\u00e0 a Turin d\u00ebl 1878. S\u00f2 esse fringant e sansoss\u00ec a l’\u00e9 arbatusse ansima soa p\u00ebrsonalit\u00e0 art\u00ecstica ch’a l’ha marc\u00e0 la canson piemont\u00e8isa, bolversande ‘l ritm e \u00a0‘l lengage.\u00a0<\/span>
\nA l’ha public\u00e0\u00a0<\/span>Mac\u00ebtte a piuma<\/em>\u00a0(1887), <\/span>\u00cbl bastard (scene siciliane – <\/em>1891<\/span>), Chitarade\u00a0<\/em>(1904), l’arvista\u00a0<\/span>Bicerineide\u00a0<\/em>ansema a Amilcare Solferini (1911), ma la p\u00ec gr\u00f2ssa part \u00ebd soa produssion a l’\u00e9 ancor ancheuj spatar\u00e0 an sij feuj e j’arviste dl’\u00e9poca.\u00a0<\/span>A l’\u00e9 m\u00f2rt a gnanca sinquant’ane ai 3 ‘d giugn d\u00ebl 1914 al Martini ‘d Turin.<\/span><\/p>\n

\n

Tito Livido |\u00a0<\/span>Dai ric\u00f2rd \u00ebd Frusta<\/a>\u00a0| Ij Brand\u00e9, 15.3.1949<\/span><\/strong>\u00a0<\/span><\/p>\n

\"\"Mi i l’av\u00eca f\u00e0it j\u00eb studi a Prato an Toscan-a, chiel a l’era n\u00e0 a Girgenti. L’\u00e9 p\u00ebr l\u00f2n ch’i scriv\u00eco tuti doi an piemont\u00e8is e che un bel di soma trovasse ansema a \u00ab’L Birichin\u00bb.<\/span>
\nD\u00f2p tanti ani im lo v\u00ebddo ancora l\u00ec dnans, come s’a fussa sempre viv, el car amis, come s’i fusso salutasse la s\u00e8ira prima: am ven ancontra am bamblinand, con la testa pieg\u00e0 sla spala drita e la s\u00f2lita aria ansignoc\u00e0.<\/span>
\nAntlora a l’av\u00eca vintess\u00e8t ani: un p\u00f2 biond, un p\u00f2 pl\u00e0, un dem\u00f2ni d’un fiolastron, brav come ‘l sol, bon come ‘l pan. Ma s’a sent\u00eca cheich cimen-a a bacaj\u00e9, a comensava a st\u00f2rze la boca, par\u00e8j dle masn\u00e0 ch’a veulo f\u00e9 la gnifa; e cola sm\u00f2rfia p\u00f2ch p\u00ebr v\u00f2lta a-j marcava sla facia na dr\u00f2la d’espression \u00ebd disgust. Se peui \u00ebl s\u00ebccamiole a tirava anans a d\u00ebsdavan\u00e9 la marela, as butava a masti\u00e9 ‘l givo ‘d toscano<\/em>, ch’a tnis\u00eca quasi sempre an boca, sprofondava le pi\u00f2te an fond a le sac\u00f2cie e a fin\u00eca p\u00ebr antasch\u00e9 le cuchije sensa d\u00ec n\u00e9 bif n\u00e9 baf. S\u00f2 dispresi a l’era mut. Ma quand che ‘l brig\u00e0ire a fas\u00eca tr\u00f2p \u00ebl galet, antlora a sent\u00eca l\u00eb bz\u00f2gn \u00ebd d\u00ebsgavassesse, sparandje ancontra certe risp\u00f2ste, ch’a part\u00eco come ‘d fus\u00ebtte. D’autre v\u00f2lte anvece as contentava ‘d rije. Ma che rijada larga,\u00a0<\/span>profonda con certi ah! ah! ah! e certi eh! eh! eh!, ch’a fas\u00eco dvent\u00e9 tut t\u00f2do l’aversari e a lo campavo<\/span>
\nl\u00e0 sensa par\u00f2le, bele bleu.<\/span>
\nIngegn a\u00f9ss, da mang\u00e9 le fave an testa a tanti. Dabon ch’a l’\u00e9 stait un dj’\u00f2mini p\u00ec inteligent ch’i l’abia conoss\u00f9.<\/span>
\nCon tut l\u00f2n a l’ha mai pod\u00f9 anfil\u00e9 ‘l cavion. Travaj\u00e9 s\u00ebl serio a j\u00eb smijava na c\u00f2sa sensa sens. A dis\u00eca: \u2013 J’osei a son le creature p\u00ec alegre ch’a-j sia. A travaj-ne? Gnanca p\u00ebr seugn. E Leopardi che ‘d compliment ch\u2019a-j f\u00e0!<\/span>
\nQuand ch\u2019as trovava des cavije ant \u00ebl bors\u00f2t, j\u00eb smijava d\u2019esse un paisan dle c\u00f2ste larghe. Pod\u00ece prom\u00ebttje un tes\u00f2r, ch\u2019a bogiava p\u00ec nen un dil.<\/span>\u00a0<\/span><\/p>\n

* * *<\/span>\u00a0<\/span><\/p>\n

D\u00eb sp\u00ecrit e n’av\u00eca da vende; ma chiel a lo regalava. A man\u00e0 a sbat\u00eca via le fior d\u00ebl s\u00f2 pens\u00e9, a man\u00e0, a galoss\u00e0, a corbele, da gran sgnor.<\/span>
\nAn chiel l’invension a l\u2019era sempre fr\u00ebsca e original, \u00ebl gust dlic\u00e0 e san. E ij vers ch’a fas\u00eca, a mostravo tuta la verve<\/em>, ‘l giget e sovens la ponta sat\u00ecrica che Gavarni a butava ant ij s\u00f2 dissegn. D\u00f2p tut a j’improvisava sensa sf\u00f2rs le soe canson, con pias\u00ec: ‘l pias\u00ec ‘d sav\u00e8i ch’a sar\u00eco gir\u00e0 p\u00ebr le stra e p\u00ebr le piasse, P\u00ebr ij caf\u00e8 e p\u00ebr ij teatro, che j’organet l’avr\u00eco sonaje, e che tuti, grand e cit, faseuse, m\u00ebrcandin-e, torototela e chansonniers<\/em>, Giaco, Pero e Martin, la Calig\u00e0ris e la Pina Ciotti a l’avr\u00eco cantaje. Ma a sav\u00eca dc\u00f2 che la soa lira a pod\u00eca mach esse la chitara (tra par\u00e8ntesi a la sonava bin). P\u00ebr l\u00f2n \u00ebl l\u00ecber \u00ebd poes\u00ece ch’a l’ha lassane, a l’ha ciamalo \u00ab Chitarade \u00bb<\/em>. P\u00f2che p\u00e0gine, p\u00f2chi sonet, ch\u00e8ich martelin e na tranten-a ‘d canson… ma tre o quat a resto tra le p\u00ec bele dla leteratura piemont\u00e8isa…<\/span>
\nCon j’amis as das\u00eca l’aria sufisanta d\u00ebl c\u00ecnich. Mi per\u00f2 i lo conoss\u00eca bin e i sav\u00eca che an fond al cheur a st\u00ebrmava na ven-a sutila \u2018d malincon\u00eca, col’ombra \u2018d trist\u00ebssa ch’as cobia squasi sempre al rije dl’umorista. Sovens la frase ir\u00f2nica a st\u00ebrmava le l\u00e0crime: dle v\u00f2lte la rijada a sofocava ‘l disgust e la bat\u00f9a sarc\u00e0stica a fin\u00eca p\u00ebr dvent\u00e9 crudela.<\/span>
\nMi a \u00ab’L Birichin\u00bb, con tut ch\u2019i fussa l\u2019\u00f9ltima rova d\u00ebl ch\u00e8r, la g\u00f2rba dla crica, i fas\u00eca l’Artaban. Con\u00a0<\/span>chiel i dventava un bambas da lum, un patam\u00f2la, gnanca p\u00ec bon a di b\u00e0! S’am fas\u00eca na car\u00ebssa m\u00eb smijava ‘d toch\u00e9 bara; s\u2019a parlava, mi, l’Artaban, stas\u00eca ciuto, ciuto, a scotelo, com a s\u00eb scota \u2018l maestro; s’a sentensiava: \u2013 Che bruti vers! i j’arfas\u00eca sensa discute.<\/span>\u00a0<\/span><\/p>\n

* * *<\/span><\/p>\n

\"\"<\/a><\/p>\n

Ancora un ric\u00f2rd, \u00ebd sinquant\u2019ani f\u00e0.<\/span>
\nTra ‘l pont Isabela e ‘l baracon d\u00ebl dassi a-i era l\u2019Ost\u00ebr\u00eca dl’\u00ccsola d’Armida, an mes a certi filagn \u00ebd vigna, ch’a calavo gi\u00f9 dla riva fin-a an brova a P\u00f2. Sovens is n’andas\u00eco tuti doi a pij\u00e9 ‘l bagn an col’aqua ci\u00e0ira, l\u00ecmpida e polida. Pr\u00f2pi l\u00ecmpida e polida: P\u00f2 a l’era pa ancora la rian-a ch’a l\u2019\u00e9 adess. \u00cbl servissi ‘d poliss\u00eca a lo fas\u00eco la neuit le botale, che peui, un-a d\u00f2p l’\u00e0utra, as n\u00eb filavo gi\u00f9 p\u00ebr le stra ‘d Vanchija: \u00d3ndes ore a son son\u00e0<\/em>… com a dis la canson. E noi s\u00eb sbaciassavo bel e bin ant l’aqua ci\u00e0ira. Peui, apen-a che la cesa ‘d Cavoret a ciocatava ‘l mesd\u00ec, ciapavo dun-a ij n\u00f2stri strass, zichin zichet is vest\u00eco, rampiavo an pressa su dla riva e ‘ndas\u00eco a fin\u00ec sota ‘l bers\u00f2 dl\u2019\u00ccsola d’Armida a spicass\u00e9 con n’aptit da sonador doe bele porsion \u00ebd pesci vivi.<\/em><\/span>
\n…Adess al p\u00f2st dla garg\u00f2ta a-i \u00e9 l\u2019ospidal, l\u2019aqua l’\u00e9 sp\u00f2rca ch’a f\u00e0 scheur, e j’amis p\u00ec car a son andassne tuti.<\/span>
\nVive adess… che pen-a!<\/span>
\n\u00a0<\/span>
\nArrigo Frusta<\/span><\/strong><\/a><\/p>\n