{"id":12822,"date":"2013-04-01T18:07:39","date_gmt":"2013-04-01T16:07:39","guid":{"rendered":"https:\/\/www.gioventurapiemonteisa.net\/2020\/?p=12822"},"modified":"2013-04-01T18:07:39","modified_gmt":"2013-04-01T16:07:39","slug":"el-cel-an-ponta-al-dil-ed-gian-antoni-bertalmia","status":"publish","type":"post","link":"https:\/\/www.gioventurapiemonteisa.net\/2020\/?p=12822","title":{"rendered":"\u00ab\u00cbl cel an ponta al dil\u00bb \u00ebd Gian Ant\u00f2ni Bertalm\u00eca"},"content":{"rendered":"

\"\"<\/span><\/p>\n

Gian Ant\u00f2ni Bertalm\u00eca a l’\u00e9 n\u00e0 a Carmagn\u00f2la d\u00ebl 1941, ma a l’ha viv\u00f9 soa gioventura ant un cit pais \u00ebd campagna. <\/span><\/p>\n

A scriv an piemont\u00e8is e an italian e a l’ha pij\u00e0 v\u00e0ire pr\u00e9mit con soe conte e novele. S\u00f2 prim romanz an italian, “Gente normale”, a l’ha vagn\u00e0 ‘l pr\u00e9mit spessial al concors “Alfonso di Benedetto”.<\/span><\/p>\n

\u2022 \u2022 \u2022<\/p>\n

I vivoma temp \u00ebd burian-a. P\u00ebr tut e p\u00ebr ij l\u00ecber p\u00ec ancora. Ma as resist, as serca \u2018d resiste. Ij piemont\u00e8is a son gent ch\u2019a m\u00f2lo nen la cass\u00f2la a la prima dificolt\u00e0.\u00a0<\/span>\u00a0<\/span><\/em>
\n Ij bogianen a san rangesse, a con\u00f2sso le fatighe e a van anans bele se la buria a-i fa and\u00e9 p\u00ec adase. A l\u2019\u00e9 bel ars\u00e8ive \u2018d l\u00ecber ch\u2019a seurto p\u00ebr costa \u201cveja resistensa neuva\u201d, coma a dis\u00eca Tavo Burat. E an f\u00e0 tant pias\u00ec segnal\u00e9 ch\u2019a l\u2019\u00e9 pen-a surt\u00ece, p\u00ebr la Ca d\u00eb Studi Pinin Pac\u00f2t-Piemonte in Bancarella, un volum \u00ebd conte serie e conte grin\u00f2ire \u2018d Gian Antonio Bertalmia, \u00ab\u00cbl cel an ponta al dil\u00bb , con l\u2019\u00abAchit\u00bb \u00ebd Mich\u00e9l dij Bonav\u00e9.<\/span><\/em>
\n \u00a0<\/span><\/em>
\n Bertalmia a l\u2019\u00e9 \u2018d Carmagn\u00f2la, a l\u2019ha scriv\u00f9 an italian e an piemont\u00e8is segnalandse an diversi Concors leterari. Adess a n\u00eb smon cost boch\u00e8t \u00ebd vintessinch conte ant un bon piemont\u00e8is nostran, \u201cst\u00f2rie \u2018d vita ch\u2019an conto ij pias\u00ec, le por, \u2026la g\u00f2j dla gent a la bon-a\u201d. Par\u00f2le ch\u2019a mosso d\u2019arc\u00f2rd, emossion, veuja \u2018d rije; par\u00f2le \u2018d ca ch\u2019an comeuvo, par\u00f2le \u2018d col bon sens d\u2019antan, pass\u00e0 \u2018d m\u00f2da, ma chi sa mai ch\u2019a peula torna servine; par\u00f2le ch\u2019an buto \u2018d bonimor. E \u2018d n\u2019onsa \u2018d bon sangh i-j n\u2019oma damaca an temp coma costi, p\u00ebr nen lassesse d\u00ebstiss\u00e9 la speransa, e manten-e visca la fiusa, l\u00eb sguard s\u00ebl pass\u00e0 p\u00ebr l\u2019avn\u00ec.<\/span><\/em><\/p>\n

Albina Malerba<\/a>\u00a0|<\/strong>\u00a0To7 \u00a05.4.2013<\/span><\/em><\/p>\n

\u2022 \u2022 \u2022<\/p>\n

\u00cbl cel an ponta al dil<\/span><\/strong><\/span>
\nGian Ant\u00f2ni Bertalm\u00eca<\/strong><\/p>\n

\u00a0<\/span>
\n\"\"Na rijada smors\u00e0 e stenzua a l\u2019av\u00eca d\u00ebsvijalo an col d\u00f2p-disn\u00e9 \u00ebd luj pien \u00ebd tuf. Adasi\u00f2t a l\u2019era avzinasse a la fnestra e a l\u2019av\u00eca ghici\u00e0 f\u00f2ra. Par\u00e8j a l\u2019av\u00eca v\u00ebdduje e a l\u2019av\u00eca cap\u00ec che cola sen-a e cola rijada a sar\u00eco intraje \u2019nt \u00ebl sangh e a l\u2019avr\u00eco compagnalo p\u00ebr tuta la vita. \u00cbdc\u00f2 ancheuj, combin che a sia passaje tant temp e a sia squasi vej, Beppe, minca tant, quand che a sent quaidun a rije par\u00e8j, as abandon-a a la malincon\u00eca dj\u2019arc\u00f2rd, arc\u00f2rd rest\u00e0 viv e sclint e mai spar\u00ec ant la fumosa nebia dla d\u00ebsmentia.<\/span>
\nAnt l\u2019ist\u00e0 d\u00ebl \u201944 Beppe, come tanti \u00e0utri giovo, a l\u2019av\u00eca abandon\u00e0 la divisa \u2019d l\u2019es\u00e8rcit e a l\u2019era butasse con ij partigian che a batajavo e a s\u00eb st\u00ebrmavo ant le campagne e an montagna. Cola matin-l\u00ec, con tre compagn, a l\u2019av\u00eco pij\u00e0 d\u2019ass\u00e0ut un c\u00e0mion tedesch che a portava \u2019d riforniment a na caserma e che a l\u2019avr\u00eca dov\u00f9 esse sensa sc\u00f2rta. Ma, tut ant un moment, da drinta al camion a l\u2019era surtije na vinten-a \u00ebd sold\u00e0 tedesch che a j\u2019ero butasse a spar\u00e9 con ij mitra e a l\u2019av\u00eco mass\u00e0 doi dij s\u00f2 compagn. Beppe, pij\u00e0 \u2019d sorpr\u00e8isa, a l\u2019era sentusse sperd\u00f9, peui a l\u2019era arpijasse e a l\u2019era campasse gi\u00f9 dla scarp\u00e0 ch\u2019a cor\u00eca \u2019d fianch a la stra e, d\u00f2p d\u2019av\u00e8j trav\u00ebrs\u00e0 na bialera, a l\u2019era liberasse dj\u2019arme e a l\u2019era intr\u00e0 \u2019nt \u00ebl b\u00f2sch. A l\u2019\u00e9 st\u00e0it antlora che a l\u2019era antajass-ne desse st\u00e0it fer\u00ec a na spala e, s-ciancandse la camisa, a l\u2019av\u00eca s\u00ebrc\u00e0 \u2019d f\u00ebrm\u00e9 \u00ebl sangh che a surt\u00eca.<\/span>
\n\u00a0<\/span>
\nPr\u00f2pi an col moment le nivole che a j\u2019ero ambaronasse \u2019nt \u00ebl cel a j\u2019ero st\u00e0ite squars\u00e0 da l\u00f2sne amborgnante compagn\u00e0 da colp \u00ebd tron ch\u2019a \u2019nciorgn\u00eco e a l\u2019era comensaje \u2019n temporalass furios, un \u00ebd coj orissi d\u2019ist\u00e0 violent, andova che \u2019l cel a smija che a veuja v\u00ebrs\u00e8 sla tera tuta l\u2019eva dl\u2019univers. Beppe a pod\u00eca nen f\u00ebrmesse, a sent\u00eca che a-j cor\u00eco apress, a sent\u00eca an lontanansa \u2019l baul\u00e9 dij can e, contut che la fer\u00eca a-j f\u00e8issa mal e che ij vest\u00ec bagn\u00e0 mars as ancol\u00e8isso a c\u00f2l, a l\u2019av\u00eca cor\u00f9 motobin tant an col b\u00f2sch e sota a col diluvi sensa sav\u00e8j andova ch\u2019a \u2019nd\u00e8issa. Adess a l\u2019av\u00eca chit\u00e0 \u00ebd pieuve ma \u00ebl cel a continuava a esse scur e \u2019l tron a continuava a b\u00ebrbot\u00e9 an lontanansa. \u00cbl d\u00f2p-disn\u00e9 a dov\u00eca gi\u00e0 esse bastansa anans. Beppe as sent\u00eca motobin d\u00e9bol, la fer\u00eca a-j sagnava e a lo fas\u00eca seufre, ma a continuava a core, rabastandse, p\u00ebr slontanesse \u2019l p\u00ec possibil. Tut ant un moment j\u2019\u00e8rbo e ij busson a l\u2019av\u00eco comens\u00e0 a rairisse e, antlora, combin che a l\u2019av\u00e8issa la vista an-nebi\u00e0, a l\u2019av\u00eca v\u00ebddula. A l\u2019era na cassin-a, nen gr\u00f2ssa e \u2019n p\u00f2ch mal but\u00e0, che a l\u2019av\u00eca na costrussion andova a-i ero le stansie dij paisan, na stala con na cita fnera, n\u2019\u00e8ira e na corm\u00e0 p\u00ebr j\u2019arn\u00e8is e ij ch\u00e8r. Na straj\u00f2ta \u2019d campagna, che a trav\u00ebrsava \u2019n camp \u00ebd melia, a portava a \u2019n pais\u00f2t che as v\u00ebdd\u00eca p\u00f2ch distant a l\u2019orisont. Beppe a l\u2019era avzinasse prudent, la cassin-a a smijava sensa gnun, peui, vist che a-i era gnun can, a l\u2019era intr\u00e0 ant l\u2019\u00e8ira e a l\u2019av\u00eca ciam\u00e0 se a-i era quaidun. La p\u00f2rta, \u00ebd cola ch\u2019a dov\u00eca esse la stala, a l\u2019era duv\u00e8rtasse e a l\u2019era surtije na fomna tuta vest\u00eca \u2019d n\u00e8ir con un gr\u00f2ss fassol\u00e8t n\u00e8ir grop\u00e0 an testa. An man a l\u2019av\u00eca un fusil, na veja dobi\u00ebtta da cassa e a l\u2019era f\u00ebrmasse a qu\u00e0iche pass da Beppe. \u201cVa via\u201d a l\u2019av\u00eca brajaje fasendje s\u00e8gn con la punta d\u00ebl fusil, \u201cva via o it \u00ebsparo.\u201d Beppe a l\u2019era f\u00ebrmasse \u2019nt la p\u00e0uta \u2019n mes a l\u2019\u00e8ira, a tribulava a respir\u00e9, a l\u2019era c\u00e0ud \u00ebd frev, as ten\u00eca sgnac\u00e0 \u00ebl t\u00f2ch \u00ebd camisa sla fer\u00eca ch\u2019a sagnava, a stas\u00eco p\u00ebr mancheje le f\u00f2rse, a stas\u00eca p\u00ebr robat\u00e9 quand che la fomna a l\u2019av\u00eca pos\u00e0 \u2019l fusil, a l\u2019era arambasse a chiel e a l\u2019av\u00eca portalo ant la stala. Ant la stala a-i ero doe vache e \u2019n mul grop\u00e0 a la grupia e, ant un canton, a-i era na b\u00ebrlecia con na pajassa \u2019d feuje s\u00ebcche. La fomna a l\u2019av\u00eca cogialo, a l\u2019av\u00eca d\u00ebsvestilo dij s\u00f2 vest\u00ec bagn\u00e0, a l\u2019av\u00eca coatalo con na co\u00e8rta veja ch\u2019a spussava d\u00eb liam, peui a l\u2019era surt\u00eca p\u00ebr torn\u00e9 con na bota d\u2019\u00e0lcol, dij fi\u00f2ch \u00ebd cotonin-a e dle binde. A l\u2019av\u00eca lavaje la fer\u00eca antramentre che Beppe a t\u00ebrmolava da la frev e dal mal, peui a l\u2019av\u00eca ciamaje come ch\u2019a stas\u00eca e chiel b\u00ebsbijand e batend ij dent a l\u2019av\u00eca dije: \u201c I l\u2019heu fr\u00e8id, i l\u2019heu tanta fr\u00e8id.\u201d Alora la fomna a l\u2019era d\u00ebsvestisse, a l\u2019era rest\u00e0 patanua, a l\u2019era anfilasse sota a le co\u00e8rte e a l\u2019av\u00eca strenzulo a s\u00f2 c\u00f2rp c\u00e0ud fin che Beppe a l\u2019era andurmisse.<\/span>
\n\u00a0<\/span>
\nA la matin d\u00f2p, quand che a l\u2019era d\u00ebsvijasse, \u00ebl sol a l\u2019era gi\u00e0 \u00e0ut e a intrava da la fnestra ch\u2019a das\u00eca an sl\u2019\u00e8ira. Beppe a l\u2019av\u00eca butaje \u2019n moment a cap\u00ec andova ch\u2019a fussa. A l\u2019av\u00eca p\u00ec nen la frev e a l\u2019av\u00eca s\u00ebrc\u00e0 d\u2019aussesse ma la fer\u00eca a-j fas\u00eca \u2019ncora mal. Peui, adasi\u00f2t, a l\u2019era tornaje \u2019n ment ij f\u00e0it d\u00ebl di prima, la sparat\u00f2ria, la scapada travers ij b\u00f2sch, la cassin-a isol\u00e0 e la fomna vestija \u2019d n\u00e8ir con \u00ebl fusil an man. A l\u2019era arcordasse, come \u2019nt un seugn, che la fomna a l\u2019era d\u00ebspojasse e a l\u2019era mostrasse come na fija giovo e bela, ma s\u00f2n-s\u00ec a l\u2019era nen prop\u00ec sicur ch\u2019a fussa capit\u00e0 o se a fussa mach st\u00e0it \u00ebl deliri dla frev. Ma prop\u00ec an col moment la p\u00f2rta a l\u2019era duvertasse e, con doe galin-e che a-j marciavo dnans, a l\u2019era intraje la fomna vest\u00eca \u2019d n\u00e8ir. A l\u2019era avzinasse a la b\u00ebrlecia e salutandlo con un s\u00e8gn \u00ebd la testa a l\u2019av\u00eca ciamaje coma che as sent\u00e8issa. \u201cBastansa bin, grassie a soe cure\u201d a l\u2019av\u00eca risponduje Beppe che adess a pod\u00eca beichela da davzisin. A l\u2019av\u00eca \u2019n facin giovo e motobin bel, j\u2019euj a j\u2019ero azur, ci\u00e0ir e pien \u00ebd lus, a smijavo doi fnestr\u00f2t duvert\u00e0 s\u00ebl cel, a l\u2019av\u00eca ij l\u00e0ver c\u00f2ti e carnos e s\u00f2 soris, malinc\u00f2nich e gen\u00e0, as duvertava ansima a dij dent bianch ch\u2019a smijavo pitur\u00e0. Da sota al fassol\u00e8t n\u00e8ir ch\u2019a portava \u2019n testa a-j surt\u00eca dij cav\u00e8j seuli e biond color \u00ebd l\u2019amel. A pod\u00eca av\u00e8j p\u00ec o meno na vinten-a d\u2019agn.<\/span>
\nLa fija, soridend an manera pen-a p\u00ebrcep\u00ecbil, a l\u2019av\u00eca giutalo a tiresse \u2019n po\u2019 s\u00f9 da le co\u00e8rte. An man a l\u2019av\u00eca \u2019n fassol\u00e8t a quadr\u00ebttin ross e bianch grop\u00e0 come \u2019n fag\u00f2t, a l\u2019av\u00eca posalo sla pajassa e a l\u2019av\u00eca tir\u00e0 f\u00f2ra \u2019n t\u00f2ch \u00ebd pan e \u2019n t\u00f2ch \u00ebd formagg. Con un cassul a l\u2019av\u00eca p\u00ebsc\u00e0 d\u00ebl l\u00e0it da drinta a \u2019n sigilin e a l\u2019av\u00eca ampinije na tassa. \u201cA l\u2019\u00e9 tut l\u00f2n ch\u2019i peuss eufrite\u201d a l\u2019av\u00eca dije, \u201ccon sta gu\u00e8ra la vita a l\u2019\u00e9 sempre p\u00ec dura, as treuva p\u00ec gnente.\u201d Beppe a l\u2019av\u00eca ringrassiala e a l\u2019era campasse an s\u00ebl mang\u00e9 con angordisa antramentre che la fija a surt\u00eca con le vache e \u2019l mul. P\u00ebr tut \u00ebl di a l\u2019av\u00eca nen v\u00ebddula. A dov\u00eca gi\u00e0 esse d\u00f2p-disn\u00e9 tard quand che a l\u2019era vnuje a port\u00e9 quaic\u00f2s p\u00ebr sin-a e sta v\u00f2lta ant \u00ebl fag\u00f2t a quadr\u00ebttin a-i era doi euv dur e na patata buj\u00eca. Antramentre che Beppe a mangiava la fija, an p\u00e9 \u00ebd fianch a la b\u00ebrlecia, a lo beicava. \u201cCome ch\u2019i t\u00eb stas? Come ch\u2019it sente stass\u00e8ira?\u201d A l\u2019av\u00eca ciamaje rangiandje la co\u00e8rta. Beppe, beicandla fiss an coj maravijos euj azur, a l\u2019av\u00eca dije: \u201c I l\u2019heu ancora fr\u00e8id, tanta fr\u00e8id.\u201d<\/span>
\n\u00a0<\/span>
\nAntlora la fija, sensa parl\u00e9, a l\u2019av\u00eca duvert\u00e0 \u2019n p\u00f2ch coj l\u00e0ver d\u00eb vlu e, anviscand un cit soris malinc\u00f2nich, soris che a comensava l\u00e0 andova a nasso le lerme, a l\u2019av\u00eca comens\u00e0 a d\u00ebsvestisse. A l\u2019era gavasse col or\u00ecbil faudal n\u00e8ir, adasi\u00f2t, con moviment meusi e s\u00f2 c\u00f2rp a flet\u00eca come na rama \u2019d s\u00e0les al vent \u00ebd la matin bonora. A l\u2019av\u00eca gavasse \u2019l folar da la testa e na casc\u00e0 \u2019d cav\u00e8j color \u00ebd l\u2019amel a l\u2019av\u00eca coataje le spale. Peui, pian, pian, a l\u2019era mont\u00e0 an sla b\u00ebrlecia e a l\u2019era cogiasse \u2019d fianch a Beppe. S\u00f2 c\u00f2rp a l\u2019era c\u00e0ud come \u2019l pan pen-a gav\u00e0 dal forn e Beppe a l\u2019av\u00eca comens\u00e0 a caressela, adasi\u00f2t, tocandla con bel deuit. E soe man a j\u2019ero posasse ansima ai sen, cit, squasi \u2019ncora da fij\u00ebtta, an sij fianch da la curva dlic\u00e0, an sla pansa piata e an sle cheusse longhe e nervose. E a l\u2019av\u00eco f\u00e0it l\u2019amor, n\u2019amor istintiv, natural, doss, sensa parl\u00e9. E col amor a-j pasiava nen mach ij sens ma a-j fas\u00eca d\u00ebsmenti\u00e9 le crudelt\u00e0 dla gu\u00e8ra, ij m\u00f2rt, ij feu, le paure e le violense. Peui a j\u2019ero st\u00e0it slong\u00e0 an silensi un \u00ebd fianch a l\u2019\u00e0utr. Oramai la lus d\u00ebl sol a intrava da la fnestra con ij ragg d\u00eb sbies e ant \u00ebl cel qua\u00ecche nivola as vest\u00eca gi\u00e0 \u2019d ross p\u00ebr festeg\u00e9 \u00ebl tramont. Na penombra rossa a \u2019nlupatava \u2019l silensi dla stala che a l\u2019era rot, minca tant, dal romor \u00ebd le bestie grop\u00e0 a la grupia.<\/span>
\n\u201cComa ch\u2019it ciame? Da \u2019nt\u00e9 ch\u2019it ven-e?\u201d A l\u2019av\u00eca ciamaje la fija virandse s\u2019un fianch e, pogiandse s\u2019un brass p\u00ebr beichelo \u2019nt j\u2019euj. \u201cIm ciamo Beppe e son \u00ebd Turin\u201d a l\u2019av\u00eca risponduje car\u00ebssandje ij cav\u00e8j e a l\u2019av\u00eca contaje tuta soa st\u00f2ria, da quand che a l\u2019av\u00eca lass\u00e0 l\u2019es\u00e8rcit p\u00ebr and\u00e9 con ij partigian, fin-a a l\u2019ambosc\u00e0 \u2019d qu\u00e0iche di prima con la scapada travers dij b\u00f2sch fin-a a l\u2019ariv ant la cassin-a, \u201ce ti coma ch\u2019it ciame? C\u00f2s fa-sto tuta sola ant una cassin-a f\u00f2ra \u2019d man par\u00e8j?\u201d<\/span>
\n\u00a0<\/span>
\n\u201cIm ciamo Rapsod\u00eca\u201d a l\u2019av\u00eca dije la fija cogiandse a pansa \u2019n aria \u2019d fianch a chiel.<\/span>
\n\u201cRapsod\u00eca?\u201d A l\u2019av\u00eca anterompola Beppe, \u201ca l\u2019\u00e9 \u2019n bel n\u00f2m ma am \u00ebsmija \u2019n po\u2019 dr\u00f2lo, un po\u2019 f\u00f2ra via.\u201d \u201cM\u00e8 pare, ch\u2019a fas\u00eca \u2019l guardia-parch, a l\u2019av\u00eca vors\u00f9 ciameme par\u00e8j p\u00ebrch\u00e8 a l\u2019era entusi\u00e0stich e anciarm\u00e0 dal gasoj\u00e9 dj\u2019osej, dal son d\u00ebl sotb\u00f2sch e dal ciosion\u00e9 dij biarl\u00f2t che a j\u00eb smijavo na rapsod\u00eca,\u201d a l\u2019av\u00eca continu\u00e0 la fija antramentre che soe ciaf\u00ebrle a pijavo un color verm\u00e8j, \u201ci son sola an costa cassin-a che i l\u2019av\u00eco cat\u00e0 mi e m\u00e8 \u00f2m. Peui, pen-a mari\u00e0, chiel a l\u2019era st\u00e0it ciam\u00e0 sota a j\u2019arme e a l\u2019era m\u00f2rt ant un scontr a feu s\u00ebl front grech. I l\u2019av\u00eca pens\u00e0 d\u2019andemne via, ma i l\u2019heu p\u00ec gnun i son sola al mond e m\u00e8 m\u00ebss\u00e9 e mia mad\u00f2na, che a j\u2019ero gi\u00e0 nen content che s\u00f2 fieul am pij\u00e8issa, a l\u2019av\u00eco sarame la p\u00f2rta \u2019n facia. Antlora i vivo ambeless\u00ec e faso and\u00e9 anans la cassin-a con doe vache, un mul, qu\u00e0ich cunij e qua\u00ecche galin-a. I travajo \u2019dc\u00f2 \u2019n t\u00f2ch d\u2019\u00f2rt p\u00ebr le v\u00ebrdure, a la finitiva im rangio con lon ch\u2019i l\u2019heu certam\u00e8nt che mia vita a l\u2019\u00e9 nen pr\u00f2pi reuse e fior ma a l\u2019\u00e9 pien-a \u2019d sagrin e dura. Ma \u2019ncheuj i son contenta, a m\u00eb smija \u2019d toch\u00e9 \u2019l cel con un dil, v\u00ebdde-sto,\u201d e a l\u2019av\u00eca slong\u00e0 un dil vers la fnestra e, mostrandje con \u00ebl dil \u00ebl cel ch\u2019a l\u2019era vn\u00f9 carmin, \u201cv\u00ebdde-sto ch\u2019i toch \u00ebl cel con un dil? V\u00ebdde-sto che \u2019l cel a l\u2019\u00e9 \u2019n ponta a m\u00e8 dil?\u201d Beppe a l\u2019av\u00eca pijaje cola man sp\u00f2rzua, a l\u2019av\u00eca tirala gi\u00f9, a l\u2019av\u00eca portass-la a la boca e a l\u2019av\u00eca basaje tante v\u00f2lte col dil che chila a continuava a ten-e pont\u00e0. L\u2019indoman Rapsod\u00eca a l\u2019era vnua a porteje quaic\u00f2s da mang\u00e9 anv\u00ebrtoj\u00e0 ant \u00ebl fassol\u00e8t a quadr\u00ebttin, peui, d\u00f2p d\u2019av\u00e8je d\u00e0 \u2019n basin, a l\u2019av\u00eca d\u00ebstac\u00e0 le bestie e a l\u2019era surt\u00eca da la stala. La giorn\u00e0 a l\u2019era gi\u00e0 c\u00e0uda an cola matin\u00e0 \u2019d luj, a-i era nen un fil d\u2019aria, a-i era \u2019n tuf \u00f9mid e tachiss, che \u2019l sol, gi\u00e0 \u00e0ut ant \u00ebl cel, a possava ant la stala con la soa lus c\u00e8ira e sbalucanta. Beppe a l\u2019av\u00eca mangi\u00e0 cole p\u00f2che vitovaje peui, vagn\u00e0 da la d\u00ebbol\u00ebssa che a l\u2019av\u00eca ancora a c\u00f2l e dal tuf, a l\u2019era strojassasse sla pajassa \u2019d feuje s\u00ebcche e a l\u2019era fin\u00ec an col ansupiment che a l\u2019\u00e8 \u2019l principi dla seugn.<\/span>
\n\u00a0<\/span>
\nNa rijada smors\u00e0 e stenzua a l\u2019av\u00eca d\u00ebsvijalo an col d\u00f2p-disn\u00e9 \u2019d luj pien \u00ebd tuf. Adasi\u00f2t a l\u2019era avzinasse a la fnestra e a l\u2019av\u00eca ghici\u00e0 f\u00f2ra. Par\u00e8j a l\u2019av\u00eca v\u00ebdduje e a l\u2019av\u00eca cap\u00ec. Ferm an mes a l\u2019\u00e8ira a j\u2019ero doi sold\u00e0 tedesch, un a s\u00ebrcava d\u2019ambrass\u00e9 Rapsod\u00eca e l\u2019\u00e0utr a rij\u00eca sotvos, an manera st\u00f9pida e dr\u00f2la. Beppe a l\u2019av\u00eca cap\u00ec che Rapsod\u00eca a s\u00ebrcava d\u2019ant\u00ebrnije \u2019l p\u00ec possibil p\u00ebr deje temp d\u00eb scap\u00e9. A l\u2019era saut\u00e0 gi\u00f9 da la pajassa, a l\u2019era anfilasse le braje e j\u00eb scarpon, peui a l\u2019av\u00eca s\u00ebrc\u00e0 la camisa con j\u2019euj pien \u00ebd teror ma a l\u2019av\u00eca nen v\u00ebddula. Alora a l\u2019era arcordasse che a l\u2019av\u00eca pijala Rapsod\u00eca p\u00ebr taconela. A podija nen, \u00ebd sicur, and\u00e9 d\u00eb \u2019d l\u00e0 ant \u00ebc\u00e0 a pijela e alora a l\u2019era surt\u00ec da la p\u00f2rta \u2019d dar\u00e9 dla stala che a das\u00eca s\u00ebl camp \u00ebd melia e a l\u2019av\u00eca trav\u00ebrsalo a gatagn\u00e0u, squasi rabastandse p\u00ebr t\u00e8ra a pansa m\u00f2la. Quand che a l\u2019av\u00eca trav\u00ebrs\u00e0 la straj\u00ebtta ch\u2019a portava al pais a l\u2019av\u00eca vist na camion\u00ebtta con n\u2019\u00e0utr sold\u00e0 al volant ch\u2019a spetava con \u00ebl motor d\u00ebstiss. A l\u2019\u00e9 p\u00ebr lon che a l\u2019av\u00eca nen sentuje riv\u00e9. Beppe a l\u2019av\u00eca trav\u00ebrs\u00e0 la straj\u00f2ta e a l\u2019era andasse a st\u00ebrm\u00e9 ant \u00ebl b\u00f2sch andova che a pod\u00eca beich\u00e9 la cassin-a. \u00cbl sold\u00e0 gradu\u00e0 a continuava a vor\u00e8j but\u00e9 le man a c\u00f2l a Rapsod\u00eca antramentre che l\u2019\u00e0utr sold\u00e0 a s\u2019avzinava prudent a la ca. A l\u2019era intr\u00e0 spalancand la p\u00f2rta con un c\u00e0uss e a l\u2019era surt\u00ec da l\u00ec \u2019n p\u00f2ch an corend, sventoland la camisa e brajand dj\u2019ordin s\u00e8ch e r\u00e0ucc che a smijava \u2019n can anrabi\u00e0. Antramentre a l\u2019era rivaje \u2019dc\u00f2 l\u2019\u00e0utr sold\u00e0 con la camion\u00ebtta, a l\u2019era f\u00ebrmasse vzin a col ch\u2019a brajava e, antramentre che \u2019l gradu\u00e0 a fas\u00eca mont\u00e9 Rapsod\u00eca sla camion\u00ebtta, a l\u2019av\u00eco pij\u00e0 ognidun na t\u00f2la \u2019d benzin-a, a j\u2019ero intr\u00e0 un ant \u00ebc\u00e0 e l\u2019\u00e0utr ant la stala e a l\u2019av\u00eco daje feu. Peui, an mes, a na nivola \u2019d poer, a l\u2019av\u00eco \u2019mboc\u00e0 a tuta velocit\u00e0 la stra che a passava an mes al camp \u00ebd melia e a l\u2019av\u00eco ciap\u00e0 p\u00ebr \u00ebl pais.<\/span>
\n\u00a0<\/span>
\nA l\u2019era st\u00e0it l\u2019ultima v\u00f2lta che a l\u2019av\u00eca v\u00ebdd\u00f9 Rapsod\u00eca. A l\u2019era set\u00e0 an mes a doi sold\u00e0 e, antramentre che la camion\u00ebtta as \u00ebslontanava, ij s\u00f2 cav\u00e8j, longh e color \u00ebd l\u2019amel, a svolatavo al vent. Chila a l\u2019era f\u00ebrma con la testa bassa e a l\u2019era nen solament virasse a beich\u00e8 la cassin-a che a stas\u00eca brusand.<\/span>
\nQuand che la gu\u00e8ra a l\u2019era fin\u00eca, Beppe a l\u2019era torn\u00e0 an col pais\u00f2t. A l\u2019av\u00eca ciamaje a la gent se quaidun a sav\u00eca deje dle neuve \u2019d Rapsod\u00eca ma gnun a sav\u00eca pa dije gnente. Quaidun a l\u2019era arcordasse che l\u2019\u00f9ltima v\u00f2lta che a l\u2019av\u00eca v\u00ebddula a l\u2019era \u2019n mes a dij sold\u00e0 tedesch ansima a na camion\u00ebtta che a l\u2019av\u00eca trav\u00ebrs\u00e0 \u2019l pais a tuta velocit\u00e0 \u2019l di che a l\u2019av\u00eco brusaje la cassin-a. A l\u2019era torn\u00e0 a la cassin-a, adess a l\u2019era mach p\u00ec \u2019n baron \u00ebd ruin-e brusat\u00e0 che, ant la nebia \u2019d col otonn malinc\u00f2nich, a l\u2019av\u00eco faje vn\u00ec la pel d\u2019\u00f2ca. A l\u2019era smijaje \u2019d sente ancora cola rijada dr\u00f2la, smors\u00e0 e stenzua. A l\u2019av\u00eca torna v\u00ebdd\u00f9 \u00ebl b\u00f2sch. Ij busson \u00ebd le ronze e d\u00ebl sambur a j\u2019ero macie color \u00ebd la t\u00e8ra gi\u00e0una e ch\u00ebrmisin e qu\u00e0iche \u00e8rbo a l\u2019era gi\u00e0 d\u00ebspatanu\u00e0 dai primi fr\u00e8id. Al p\u00f2st d\u00ebl camp \u00ebd melia adess a-i era \u2019n camp \u00ebd gran pen-a n\u00e0 e cola penel\u00e0 \u2019d verd c\u00e8ir a smijava l\u2019\u00f9nica c\u00f2sa viva \u2019n col paesagi malinc\u00f2nich, pien \u00ebd trist\u00ebssa e \u2019d mestissia. A l\u2019av\u00eca v\u00ebdd\u00f9 la straj\u00ebtta ch\u2019a portava al pais e, an mes a cola stra, a l\u2019era smijaje \u2019d v\u00ebdde na camion\u00ebtta con na fija dai cav\u00e8j longh color \u00ebd l\u2019amel slontanesse an mes a dij sold\u00e0 tedesch, ma sta v\u00f2lta chila as virava, a lo salutava e a-j mandava \u2019n basin.<\/span><\/p>\n

(Prim pr\u00e9mit \u00abCesare Pavese\u00bb 2010)<\/span><\/em><\/p>\n

\u25c4<\/span> Mila agn \u00ebd Literatura Piemont\u00e8isa<\/a><\/em><\/p>\n","protected":false},"excerpt":{"rendered":"

Gian Ant\u00f2ni Bertalm\u00eca a l’\u00e9 n\u00e0 a Carmagn\u00f2la d\u00ebl 1941, ma a l’ha viv\u00f9 soa gioventura ant un cit pais \u00ebd campagna. A scriv an piemont\u00e8is …<\/p>\n

\u00ab\u00cbl cel an ponta al dil\u00bb \u00ebd Gian Ant\u00f2ni Bertalm\u00eca<\/span> Leggi tutto \u00bb<\/a><\/p>\n","protected":false},"author":2,"featured_media":12827,"comment_status":"closed","ping_status":"closed","sticky":false,"template":"","format":"standard","meta":{"footnotes":""},"categories":[9,10],"tags":[3],"class_list":["post-12822","post","type-post","status-publish","format-standard","has-post-thumbnail","hentry","category-literatura-2","category-scritor","tag-news"],"_links":{"self":[{"href":"https:\/\/www.gioventurapiemonteisa.net\/2020\/index.php?rest_route=\/wp\/v2\/posts\/12822","targetHints":{"allow":["GET"]}}],"collection":[{"href":"https:\/\/www.gioventurapiemonteisa.net\/2020\/index.php?rest_route=\/wp\/v2\/posts"}],"about":[{"href":"https:\/\/www.gioventurapiemonteisa.net\/2020\/index.php?rest_route=\/wp\/v2\/types\/post"}],"author":[{"embeddable":true,"href":"https:\/\/www.gioventurapiemonteisa.net\/2020\/index.php?rest_route=\/wp\/v2\/users\/2"}],"replies":[{"embeddable":true,"href":"https:\/\/www.gioventurapiemonteisa.net\/2020\/index.php?rest_route=%2Fwp%2Fv2%2Fcomments&post=12822"}],"version-history":[{"count":0,"href":"https:\/\/www.gioventurapiemonteisa.net\/2020\/index.php?rest_route=\/wp\/v2\/posts\/12822\/revisions"}],"wp:featuredmedia":[{"embeddable":true,"href":"https:\/\/www.gioventurapiemonteisa.net\/2020\/index.php?rest_route=\/wp\/v2\/media\/12827"}],"wp:attachment":[{"href":"https:\/\/www.gioventurapiemonteisa.net\/2020\/index.php?rest_route=%2Fwp%2Fv2%2Fmedia&parent=12822"}],"wp:term":[{"taxonomy":"category","embeddable":true,"href":"https:\/\/www.gioventurapiemonteisa.net\/2020\/index.php?rest_route=%2Fwp%2Fv2%2Fcategories&post=12822"},{"taxonomy":"post_tag","embeddable":true,"href":"https:\/\/www.gioventurapiemonteisa.net\/2020\/index.php?rest_route=%2Fwp%2Fv2%2Ftags&post=12822"}],"curies":[{"name":"wp","href":"https:\/\/api.w.org\/{rel}","templated":true}]}}