Cavajer Vitòrio Amedé Borél (1723-post 1800)

Ël Cavajer Vitòrio Amedé Borél a l’é nassù a Valensa dël 1723. Militar, comandant provisional dla Sitadela ‘d Lissandria, peui governator d’Aich, autor ëd sonet e ‘d Tòni d’ispirassion arcàdica, as sà ch’a l’era ancor vivent dël 1800.

Sonat
Vitòrio Amedé Borél

 
Sent, amor bosaron, l’é temp ‘d funila,
Rendme mè cheur, tornme la mia rason,
Romp sta caden-a, seurtme da ‘n përzon,
A l’é tròp strèita, i peuss pì nen sufrila.
 
A tanti, e tanti, e i peuss conteje a mila,
It has mës-cià l’amer con ij bombon,
E për mi solament, pest al cojon,
Ël pì nèir ‘d tò velen, fotre, as dëstila.
 
It protege un gascon, ch’a n’ha ch’ ëd babìa,
Un cheur fàuss e linger l’é bin tratà,
A un incostant it use ‘d cortesìa;
 
E un pòvr diavo ch’at serv con fedeltà,
A n’preuva ch’ tò rigor, toa tiranìa;
As vad bin ch’it ses bòrgno, e ‘t ses masnà. 


◄ Mila agn ëd Literatura Piemontèisa

Powered by WordPress | Deadline Theme : An Awesem design by Orman