Vënner 3 ‘d gené a Viòla con Nicòla Duberti e «J’òmbre ‘nt le gòmbe», poesìe ant ël “parlà do kjé” dle valade dël Mondvì

A l’é pen-a surtìe për j’edission dla Ca dë Studi Piemontèis, Colan-a ‘d Leteratura Piemontèisa Moderna, un cit ma soasì lìber ëd poesìe ‘d Nicola Duberti, «J’òmbre ‘nt le gòmbe/Le ombre nelle valli. Poesie nelle parlate monregalesi di Viola e del Kjé», con prefassion ëd Giovanni Tesio e la pòst-fassion d’un dij poeta monregalèis pì avosà, Remigio Bertolino (pp.60, 7 euro; info@studipiemontesi.it).   

Nicola Duberti a l’é ‘dcò chiel dël Mondvì e a scriv sla carzà fiamenga dla tradission poética ‘d cole tère, tant ch’as peul parlesse ‘d na «scòla monregalèisa», con na soa ispirassion genìta e na lenga localisà ant ël pais dij sò, Viòla, ant l’àuta Val Mongia.

A son vers s-ciass e ancreus che come «un gioco di specchi – a scriv Bertolino – introiettano la realtà esterna e ne fanno grumi psichici, svelamenti crudi e folgoranti». D’ «ascetica misura», a parla Giovanni Tesio, d’un lìber «di bellezza notevole, di anfrattuosa verità».

Na poesìa, cola ‘d Duberti, ch’angagia ‘l letor a confrontesse con soe emossion pì ancestraj; ch’as vëda ‘l poemet sël luv: «Còs o l’é un lov o-i é neun ch’o lo sacia/ O sciòrt ëd neucc. Ti peu nent vaglo/…». Për chi a l’é nen tròp sensìbil a la poesìa a peul anteressé ‘l léssich: paròle ‘d finagi tra Piemont, Liguria, Provensa. 

(Albina Malerba | An Piemontèis, 22.11.2013)

NICOLA DUBERTI, J’òmbre ‘nt le gòmbe. Le ombre nelle valli. Poesie nelle parlate monregalesi di Viola e del Kje, prefazione di Giovanni Tesio, postfazione di Remigio Bertolino, pagg. 64 (2013). € 7,00

L’autor a presentrà «J’òmbre ‘nt le gòmbe» (J’ombre dle combe) Vënner 3 ‘d gené a 9 ore ‘d sèira a Viòla a la sala “polivalente”. 

Powered by WordPress | Deadline Theme : An Awesem design by Orman