Turin. Spassi a la lenga piemontèisa a la VII Sircoscrission

Circoscrizione_7Ai 5 ëd giugn ël consej dla VII Sircoscrission a l’ha aprovà n’ordo dël di ch’a visa a deje spassi a la lenga piemontèisa ansima sò sit.

La propòsta a l’é nassùa da na mossion dla Lega e dël Sènter-drita ch’a ciamava la virà an piemontèis dij test fiss dël sit. La conferensa dij cap-grup a l’ha mnà a la condivision ëd s’ordo dël di ch’a pressisa la volontà, goernand ël prinsipi dël bilinguism, ëd gionté an sël sit un banner con ij drapò, la stòria e d’anformassion an sle borgià dla Sircoscrission (Borgh Vanchija, Borgh Auròra, Madòna dël Pilon, Sassi), ij test ëd le canson ch’a-j nòmino e ‘l colegament ai dissionari dla lenga piemontèisa.

Ël consijé Daniele Moiso (fòto Torinon Today)

Ël consijé Daniele Moiso (fòto Torino Today)

Sa propòsta neuva, sotsignà da vàire grup consiliar, a l’é passà con 22 vot e n’astension.
Pitòst sodisfàit ël consijé leghista Daniele Moiso, promotor ëd l’operassion. Cand un pòpol a perd soa lenga a lassa andé ij tre quart ëd soe cianse ‘d survivensa. Apress la discriminassion dël piemontèis da part ëd l’ëstat (dont l’assion ëd tùa a l’é stà massà da la Lej 482/99), cost a l’é un gest pcit, conforma le possibilità ‘d na Sircoscrission, ma significant për spòrze l’ideja dla coltura dla popolassion autòctona bele a chi ch’a riva da fòra. L’integrassion as fà dcò con ëd pcit gest parèj ‘d cost-sì, a l’ha concludù Moiso sò antërvent.

La dessision final adess a-j toca a la Comun-a, ch’a-j farà rëspòsta al consej dla VIII ant ël vir ëd chèiche sman-a.

8.6.2017

Powered by WordPress | Deadline Theme : An Awesem design by Orman