Turin, dumìnica 23 ‘d Giugn: Neuit ëd la Corenda për San Gioann, con Li Brucaté, Fratelli Montgolfier, Detaran, Li Barmenk

Turin a l’é sota ‘l patronagi ‘d San Gioann Batista dai temp ëd l’argin-a Teodolinda. Tuti j’ani ai 24 ëd giugn la Capital a arcòrda sò protetor con na gran festa – che pì a passo j’ani pì a j’ësmija a n’evento ‘d coj ch’a-j piaso tant a coj dla Comun-a, andova che l’identità dla sità a l’é na vira pì stërmà. St’ann-sì, spassi a j’ideje provinciaj, e anans co’l feje la sumia a j’àutri, e tut lòn ch’a l’é ancor un pò piemontèis… coerensià an broa.

St’ann-sì 2013 (franch parèj dl’ann passà) për la festa patronal ëd Turin la Gionta av ësmon le partìe ‘d fólbal dl’Italia an sël maxiscren, un defilé ‘d mòda voglio-ma-non-posso e un ëd viture stòriche (con l’indispensàbila organisassion dla Famija Turinèisa), garaudié, Freebord (naturalment italiano), teatro d’avangarda rigorosament an tajacan, majorettes, un – almanch dal nòm – provincial Torino River Paddling, Sup e outrigger, na corsa podìstica, mùsica da tut ël mond fòra che dal Piemont, fólbal feminin, pompista an piassa, consert ëd j’anlev ëd le Scuole di Musica territoriali (cheidun për piasì ch’an dija lòn ch’a son), aikido, vintage, lingerìa.

Ma, vist ël sucess ëd l’ann passà, a la Comun-a a-j toca toleré ancor na vira la “Notte della Corenda” dumìnica 23 ‘d giugn 2013 a 8 e mesa, organisà da Li Barmenk, da la Pro Loco d’Ussej e da Armonia.

Costa sgonda edission a sarà pì nen an piassa Castel: për nen fastudié tròp ël giro che comanda Torino a l’é stàita tramuvà an piassa Vitòrio.

A-i saran a 20 minute a 9 ore Li Brucaté ‘d Pianëssa/Valade ‘d Lans, a 9 e 20 ij Fratelli Montgolfier, a 10 e 5 Detaran e a 5 minute a 11 ore Li Barmenk.

Përdive nen cost randevó con nòsta mùsica e nòste danse. Anvit Fb

Powered by WordPress | Deadline Theme : An Awesem design by Orman