Propòsta për dedicheje le stra dantorn al palas neuv dla Region a ‘d gran piemontèis dësmentià

Ël Consej dla Sircoscrission 9 ëd Turin (Bariera ‘d Nissa, Milafont, Lingòt, Filadelfia), su propòsta dël consijé  Lorenzo D’Agostino, a l’unanimità a l’ha aprovà a j’11 ëd novèmber n’Ordo dël Di për deje ‘l nòm a le contrà e a le piasse neuve ch’a faran dantorn al palas ëd la Region, dedicandje a ‘d përsonage piemontèis ch’a son fasse onor, e che fin-a ancheuj a son stàit dësmentià. 

Ël document a sugeriss na lista ‘d màssima, an proponend l’ator Erminio Macario (Turin, 1902 – 1980); l’architet Ernest Mlan (Ernesto Melano, Pinareul, 1792 – Turin, 1867), progetista dla Badìa d’Autacomba e dij castej ëd Polens e Racunis; ël cantor e ator Luigi Tenco (Cassèini, 1938 – Sanremo, 1967); ël musicista David Riss (Pancalé, 1533 – Edimborgh, 1566), dcò segretari dla regin-a Mary Stuart e autor dla Vals dle Candèile; ël pitor Giusep August Levis (Cimon, 1873 – Racunis, 1926); la poetëssa Diodata Saluzzo Roero (Turin, 1774 – 1840); ël Beat Giusep Giròt (Alba, 1905 – Dachau, 1945), biblista mòrt an camp ëd concentrament për avèj giutà j’abreo longh le përsecussion naziste; ël cardinal Mercurin Arbòri ‘d Gatinèra (Gatinèra, 1465 – Innsbruck, 1530), Gran Canslé dl’amperador Carl V d’Absborgh; ël biòlogh prémit Nòber Salvatore Lurìa (Turin, 1912 – Lexington, 1991); ij fotbaleur Eusebio Castigliano (Vërsèj, 1921 – Soperga, 1949), Guglielmo Gabetto (Turin, 1916 – Soperga, 1949), Piero Operto (Turin, 1926 – Soperga, 1949), mòrt ant la tregenda dël Gran Turin. 

Ij papé adess a passo a la comission toponomàstica dla Comun-a ‘d Turin, Comun-a famosa për dé ij nòm ëd le cotrà dla sità ëd preferensa a ‘d gran framasson e a ‘d gent che co’l Piemont a l’ha nèn a feje, ma ch’a son conform a l’ideologìa dominanta. 

13.11.2014

Powered by WordPress | Deadline Theme : An Awesem design by Orman