Prim arzultà dla petission «Piemontèis Ufissial»: ël Consej Regional a debat la propòsta ‘d lej al Parlament për ël piemontèis ant la Lej 482

Lùn-es 18 ëd luj 2011 la VI Comission regional a l’unanimità a l’ha adressà a l’Àula dël Consej ël debà an sla propòsta ‘d lej 10/2010. Costa propòsta a sarà donca butà an votassion arlongh la Ciambrea dl’apremesdì ‘d Giòbia 21 ëd luj.

La considerassion ëd sa propòsta – parià da Gioventura Piemontèisa, presentà an tan che prima sotsignataria da la Consijera Angela Motta – a l’é stàita cissà da la presentassion ëd 12.000 signature ‘d sitadin an forma ‘d petission popolar. Ai 27 ëd giugn passà ël Pressident dël Consej regional dël Piemont, M. Valerio Cattaneo, a l’avìa sigurà che le doe propòste deposità an Region da Angela Motta e da d’àutri a sarìo stàite aprovà dnans che ‘l Consej a l’avèissa sarà për l’istà. L’ampromëssa a l’é stàita onorà për lò ch’a rësguarda la PDL 10/2010, ch’a-j ciama al Parlament italian ëd passé dëdlà dla discriminassion ch’a patiss la lenga piemontèisa da pì ‘d des ani rëspet a j’àutre lenghe minoritarie ch’as parlo ant ël contest ëd la Repùblica.

Ël debà an sla PDL 8/2010 – propòsta ch’a mira a arsanì la situassion paradossal ch’a ved la lenga piemontèisa sghija a la situassion dël 1979, sensa gnun arconossiment regional – a l’é ranvià a stèmber, andova ch’i së spetoma ch’a sia calendarisà ant le prime sman-e.

Ant la fòto: 27 ëd giugn 2011 – la consëgna dle prime 12.000 signature dla petission «Piemontèis Ufissial!» da la part ëd Carlo Comòli, Resior ëd Gioventura Piemontèisa, ant le man dël Pressident dël Consej Regional dël Piemont M. Valerio Cattaneo; con lor l’On. Davide Cavallotto e la Cons. Angela Motta, prima sotsignataria dle propòste ‘d lej an Region.

A na parlo Il Cinzanino, ël sit ëd l’On. Luigi Bobba e Gli Amici del Canavesano.

Powered by WordPress | Deadline Theme : An Awesem design by Orman