Piemontèis Ufissial! – rassegna dë stampa

I l’oma mai avù na passion për le rassegne dë stampa, dagià che an Italia (ëd régola) l’anformassion a l’é nen lìbera nì coreta. A basta vardé coma an Fransa ij giornalista a dan le neuve ch’a rësgoardo l’identità dij pòpoj – bele che serte afermassion a dëspiaso ai governant – për rendse cont dla diferensa. Parloma peui nen ëd la Svissra.

Sensa dùbit la neuva dla presentassion ëd na petission ëd 12.000 signature a l’é nen un-a ‘d cole ch’a cambìo ‘l mond, tutun, da già che sta vira Gioventura Piemontèisa a l’ha daje la larga a ses (6) përson-e a fé da ufissi stampa (e i j’armersioma, da pòst ch’a son nen pagà) e ch’a l’ha cissà tute j’associassion ch’a l’han partessipà a spantié la neuva a le gasëtte locaj, i l’oma bon-a fiusa dë spetesse che ij Piemontèis a sio vnù a savèjlo. An pì che fin-a l’ANSA lùn-es 27 a l’ha batù la neuva.

Ël comunicà dël Consej Regional dël Piemont a l’é stàit ëdcò arpijà da CRPnet, dal sit dël pressident dël Consej Regional Valerio Cattaneo, da Videopiemonte e da Città Futura ‘d Lissandria.

La neuva a-i é ‘dcò an video an sël web-tg dël Consej Regional (vardelo ambelessì) e ansima sò ebdomadari radiofònich (scotelo ambelessì).

Signalassion an sël sit ëd l’On. Luigi Bobba, arpijà da Novara Puntocom… con na frisa ‘d malissia: ij vejòt an s’na banca a vorërìo miraco fene chërde che ‘l piemontèis a sarìa nen na ròba da giovo? Nòsta esperiensa an sij banchet an arvela che a-j veulo ben a nòsta lenga tant ij pì giovo com ij pì vej.

A na scrivo Vercelli Oggi (dërmage che aranda a l’abia butà na scrita an piemontèis “a la mistanfluta”), l’agensìa Fidest e Italian Network. A son stàit bin coret Casalenews, Radio Asti Europa, Friûl.net, AT News d’Ast e ‘l sit dël Movimento Regionalista.

CronacaQui a-i era (e a l’avìo za publicà n’artìcol al prinsipi dla cujìa dle signature). L’àutr giornal ëd Turin, nopà, a l’ha trovà fin-a n’ëspassi për comuniché ch’a l’é stàit tramudà ‘l di dë scadensa dël concors ëd Bariera ‘d Milan an sl’unità d’Italia, ma për ël piemontèis, n’asar, nen n’aligna.

Ël titolista ‘d City (28/6) a s’anventa na cujìa ‘d signature për la tùa d’un “dialetto”. Ma a-i é ancor cheidun ch’a fà d’anformassion con onestà: vardé Lo Spiffero, un dij blog pì visità ‘d Turin.

N’artìcol a l’é surtì an sla Luna Nuova dë Vian-a, doi an sla Gazzetta d’Alba (ai 21 ëd giugn e ai 5 ëd luj), an s’Il Biellese e an sl’Eco Risveglio Verbano-Cusio-Ossola; nòstr comunicà a l’é stàit arpijà da Il Risveglio Popolare d’Ivreja (23/6). Il Monferrato ‘d Casà (17/6) a treuva pa nèn ëd mej che buté nòsta lenga antra crochet, ma lì-ansuma i soma giumai costumà… Pì serios, Il Piccolo ‘d Lissandria a l’ha armarcà ‘l pressios contribut dij Monfrin a l’inissiativa, bele con n’artìcol surtì dòp la presentassion. La petission a l’é ‘dcò stàita seguìa dal Monviso e da L’Eco del Chisone ‘d Pinëreul. Franch pressis, peui, j’artìcoj dël Corriere Valsesiano, col anans ëd la presentassion e col apress. La neuva a l’é parëssùa an sle gasëtte locaj ‘dcò an sij suplement Porte Aperte a Palazzo Làscaris.

Ij “nòsti” ch’a l’han parlane pì che na vòta a son stàit GoPiedmont, Il Cinzanino, Gli Amici del Cavavesano e la Compagnìa dij Pastor d’Omègna.

Antra ij present ch’a l’han antërvistà ij protagonista dla giornà dij 27 ëd giugn i arcordoma Telesubalpina, Primantenna TV e Radio Veronica One. Scoté ‘l servissi ‘d Radio Veronica One

A caval ëd la presentassion ëd le signature an Region Gioventura Piemontèisa a l’ha pijà part a la trasmission Gente che parla ansuma Quartarete TV për tre sman-e ‘d fila. Vardé sì l’antërvent dij 22 ëd giugn, dnans ëd la giornà ‘d presentassion, e ij doi apress dij 29 ëd giugn e dij 7 ëd luj.

Ai 22 ëd magg, arlongh ëd la manifestassion Via Monginevro mon… amour i l’oma avù ocasion ëd parlé dla petission: vardé ‘l servissi.

La presensa dla RAI a l’ha tutun nen portà al passage d’un servissi al TG3 (“regione” nen Piemont, për la carità…) dla sèira. A l’é peui passà a mesdì ‘d tre di apress, ariessend a campeje andrinta la lingua italiana, ij dialetti ch’a ven-o a taj mach pì për le poesìe, i 150 anni dell’unità d’Italia, Pòrta Palass e, naturalment, ël sòlit “grande linguista istitussional ch’a ved nen l’ora che ‘l piemontèis a fasa l’ùltim bal. An sla fin, 30 second për una conferenza stampa in via San Secondo. I dijoma mersì tutun, anvitand chi ch’an les a vëdde ‘l reportagi e lassandje a lor ël giudissi s’un “servissi” “pùblich” che, conforma le drete antërnassionaj, a dovrìa trasmëtte ‘dcò an tute le lenghe minoritarie ‘d Piemont: Tg 3 Piemonte del 30 giugno 2011

Sens’àutr a na scrivrà l’arvista Langhe. Për antan i l’oma ciamaje ai nòsti amis e referent ëd tut ël Piemont ëd fene savèj com a daran la neuva j’àutre gasëtte.

Ëd fotografìe dla giornà dij 27 ëd giugn as treuvo belessì, d’àutre ij nòsti amis a l’han butaje ansima fb.

Ant ës sit a-i é ‘dcò ‘d tòch audio-video dla conferensa stampa e la registrassion completa dla consëgna dle signature al Consej Regional: belessì.

(agiornà ai 20 ëd luj 2011 – j’artìcoj ch’a manco i contoma ‘d buteje an sla ragnà pen-a ch’i j’avroma)

Powered by WordPress | Deadline Theme : An Awesem design by Orman