Pianëssa, 16 ëd Novèmber. La presentassion ëd la cujìa ‘d lìriche ‘d Vitòria Rollé (1941-2014)

Locandina_Vittoria Rollé

Vitòria Rollè (Villafranca Piemont, 6 ëd novèmber 1941- Pianëssa, 2014) a l’é stàita na magistra che a l’han dedicà tuta soa vita a l’educassion dij cit. Dacant al travaj, prima coma maestra elementar, e peui, dòp la giubilassion, coma maestra ‘d piemontèis, a l’ha sempre scrivù poesìe an soa lenga piemontèisa.

Omagi a la vita e a la poesìa ‘d Vittoria Rollè, për volontà dj’amis (e dl’amisa Marisa Griffero Lombardi) a seurt adess un lìber motobin soagnà: «Poesie in piemontese», Edizioni Zeisciu Alagna Valsesia, 2017, pp. 127, ilustrassion ëd Candida Rabbia.

L’antologìa poetica ‘d Vitòria a l’ha come antrodussion (an piemontèis con tradussion an italian) n’arcòrd ëd Michel dij Bonavé (Bonavero che con Vitòria a l’ha portà anans ant j’ani tanti angage për ël piemontèis ant le scòle) e në studi ‘d Sergio Maria Gilardino su soa euvra poetica, ant la carzà dla «bela scòla dij Brandé», për «portare all’attenzione del pubblico una poetessa non ancora edita».

Un salut a Vitòria ch’a l’ha lassà soa marca ‘d piemontèisa, «na caden-a ch’a gropa tuti dal passà a l’avnì”, e an silensi a l’é andasne “cunà dal bësbij dël vent /…/ ant ël misteri ancreus ëd l’infinì».

Albina Malerba, To7 3.11.2017


Vitòria Rollé

Powered by WordPress | Deadline Theme : An Awesem design by Orman