MILA AGN ËD LITERATURA PIEMONTÈISA | ËL PROGÉT

Mila agn ëd Literatura Piemontèisa a l’é un progét, elaborà da Gioventura Piemontèisa l’ann 2000, ch’a visa a provëdde na base d’anformassion essensial ansima la ragnà rësgoard a la sivilisassion literaria piemontèisa – dëspresià e stërmà da la coltura ufissial italian-a.

Ij test ëd base a son gavà da la publicassion Mila agn ëd literatura piemontèisa/Mille anni di letteratura piemontese – Dispense dë stòria dla literatura piemontèisa, soagnà da Dario Pasé e da March Bèllora (publicà ant ël quàder dël prim proget La Lingua Piemontese a Giugn dël 2000 con la redassion ëd Gioventura Piemontèisa) e da Profil ëd la Literatura piemontèisa d’ancheuj ëd Dario Pasé, publicà la prima vira an sël sit http://www.poetidelparco.it.

Ij test a son completà e agiornà con le contribussion ëd +Renata Capello, Robert J.M. Novero e mersì la colaborassion ëd j’ëstudios ch’a l’han car ëd partessipé. Ës travaj a va anans a tìtol volontari, dagià che gnun-a institussion, pùblica o privà, a l’é mai pijasse a cheur ëd sostnì cost progét. 

Le schede dj’Autor a propon-o, aranda a ‘d test inédit, ëdcò ‘d recension scrivùe da le mej piume dla literatura piemontèisa gavà da j’arviste stòriche e da ‘d publicassion fòra comersi. Costi studi e costi artìcoj, coma che la Literatura Piemontèisa a l’é ancor nen materia scolàstica, a restrìo sarà ant j’archivi e ant le biblioteche e a l’avrìo parèj pòche ocasion d’esse lesù e studià; l’istess as peul disse dël material iconogràfich, për la pì part malfé da artrové përchè spatarà ansima vàire arviste. I crejoma ‘d fé un bon servissi a la conossensa ‘d nòsta stòria literaria an butand a salvament da la dësmentia tut ës material an ësmonendlo ansima costi feuj.

La colaborassion a l’é duverta a tùit j’ëstudios anteressà.
Gioventura Piemontèisa a s’angagia a arconòsse ij drit dovù o a sganfé via dal sit ij tòch sogetà a ©

Gioventura Piemontèisa | giovpiem@yahoo.it

 Mila agn ëd Literatura Piemontèisa

Powered by WordPress | Deadline Theme : An Awesem design by Orman