L’italia a l’é un regim ch’a tira a fé fòra tute nòste autonomìe con l’agiut dij traditor. Gioventura Piemontèisa e Piemont Ëstat a protesto fòra dla Provinsa ‘d Coni

A l’han contanla për vàire con l’abolission dle Provinse, an ësmonendne s’operassion coma s’a fussa stàita na gròssa “arforma” (ansi: l’arforma ch’a l’avrìa dovù “salvé l’italia”). Com ëd costuma, a l’é finì tut à l’italienne: le Provinse a l’han peui nen abolìe, ma a l’han abolì le votassion.

Ël decret Delrio (nr. 1542-B) a stabiliss che për ël pressident e ij consej provinsiaj ij sitadin a peulo pì nen vòté, ma a vòto mach j’elet ant le Comun-e. A l’han decidulo a Roma, e nojàutri Piemontèis i podoma gnanca buteje bech (ij Sissilian, nopà, ël decret Delrio a l’han arfudalo ‘d pianta).

Parèj ij polìtich locaj, ch’a l’han ij sò referent a Roma, a l’han butasse d’acòrde e ancheuj, 12 d’otóber 2014, dë stërmion, sensa che la gent a lo savèisso, a l’han votasse ij sò pressident dle Provinse e dj’àree metropolitan-e.

Gioventura Piemontèisa ansema a Piemonte Stato a j’ero fòra dël “segg eletoral” dla Provinsa ‘d Coni a protesté, a anvité ij consijé a nen andé voté e a dnunsié àuta vos che la democrassìa a l’é giumai andàita.

Ant la Granda ij pochi eletti a l’avìo gnanca tant da sagrinesse a serne përchè… a-i era na lista sola. Ò-già, na lista sola; coma ant l’Union Soviética; coma ai temp dël regim.

Sensa gnun-a onta, a quatr di da la scadensa dla TASI, j’ësgnori pochi eletti dël “Partito-unico-italia” a l’han votasse antra ‘d lor, tuti ansema e un pes che l’àutr.
A lor a j’anteressa nen che nòstr Pais (Piemont) a ven-a na vira pì pòver, che ij nòsti giovo as na vado travajé a Londra o an Mérica, che na bon-a part dij nòsti vej a rivo nen a la fin dël mèis, che noi i sio na vòta ‘d pì ciapà andrinta an cost ëstival a mità tra i Balcan e l’Àfrica dël Nòrd, antant ch’i podrìo esse n’àutra Àustria o n’àutra Danmarca.

A costi ascari a-j n’anfà mach ëd la cadrega e dla cariera. A l’han nen vërgògna dë sté ciuto antant ch’an gavo ‘l drit ëd voté (i votroma pì nen për le Provinse, ma gnanca pì për ël Senat). A l’han nen ël corage d’oponse al proget ch’a veul le Region na vòta ‘d pì dësvoidà ‘d competense e peui abolìe de facto a travers la modìfica dël Tìtol V dla constitussion italian-a.

Nòsti consijé comunaj e nòsti sìndich (ch’a l’han nen banfà gnanca cand a l’han gavaje la tesorarìa comunal për porté diret tùit ij sòld a Roma) ancheuj a van tùit an fila come j’òche a fé sò dovere istituzionale, a sostnì la burla dla votassion për na lista ùnica, tuti anquadrà, sensa na frisa ‘d corage e ‘d dignità. A son d’arnià, a son ëd burabacio butà lì për ten-e ‘l pòst e aussé la man quand ch’a-j lo diso ij sò padron da Roma. A son falì, considereje come s’a fusso pì nen piemontèis.

Dnans a costa procission penosa nojàutri Piemontèis i j’ero lì a dì ciàir e fòrt che l’italia as peul nen riformesse, ch’a l’é ‘n pais tutafàit refratari a qualsëssìa dëscors autonomista, federalista, identitari, e che, për mentalità e për costumanse, a l’é destinà a seurte na vira ‘d pì dal contest sivil.

A-i va ‘l corage che nòsti aministrador a l’han nen për capì che l’ùnica stra a l’é cola ‘d fé parèj dla Scòssia e dla Catalunya: andé voté, dnans ch’a sia tròp tard, për l’indipendensa dël Piemont e seurte parèj da nòsta dimension colonial. Col gran Pais europengh ch’a son stàit j’Ëstat ëd Savòja a peulo ancor fé soa part, na vòta liberasse dal pèis ëd n’ëstat levantin sensa speransa.

 Provincia di Cuneo: dentro le elezioni, fuori l’indipendenza

Powered by WordPress | Deadline Theme : An Awesem design by Orman