Ettore Piazza (1901-1962)

Ettore Piazza
(1901-1962)

Nà a Carpignan Sesia ël mèis d’otóber dël 1901, a l’é mancà a Nervi ël 1m ëd gené dël 1962.
A l’é, forse, ël poeta pì significativ dël Piemont dzora la Resistensa antifassista. Militant comunista, esponent dël CLN ‘d Noara, sìndich ëd Carpignan, dirigent polìtich e diretor dël giornal «La Lotta», a l’ha dedicà soa vita, fin-a a l’ùltim, a la lòta popolar për n’umanità pì giusta.
Obligà a fërmesse da la maladìa che a l’avrìa strompalo, a l’é butasse a scrive (oltra che ‘d polìtica) d’euvre ‘d teatro e ‘d poesìa an italian e an piemontèis, tant che ant ël 1953 a l’ha vinciù (ex æquo con Ignazio Buttitta) ël «Premio Cattolica», che a contava an giurìa dcò Salvatore Quasimodo e Eduardo De Filippo.
Soa poesìa a l’é antërsà con la filigran-a dla solidarietà uman-a che a tend a la realisassion ëd sò ideal, an sla carzà segnà da l’utopìa marxista, da andoa a-j trassuda coma patrimòni istintiv ël mëssagi milenari dla tradission popolar cristian-a.
Travers soa poesìa i voroma spòrze un ësfiam ëd la profonda umanità e dël candor ëd sò spìrit. 

Camillo Brero
Ij Brandé – Armanach ëd Poesìa piemontèisa | 1997

 

Ma sa vita ch’i ciarcava…
Ettore Piazza

 
Lassemi satè ‘n tèra an mezz a viàucc
mataj tacà la pòrta dla vòsta ca
la testa pogià contra ‘l mur ‘nco’ càud
d’ës sol d’istà
j’eugi sbarazaj vardè ‘l stèli.
Lassemi senti l’odor dla tèra e dël fen
ch’l’è ‘nt l’aria ‘nt ij veus-cc vistì.
Parlé ch’i senta ‘nt ij vòsti paròli
la vòsta fatiga mataj e la spiränza
ch’i pòda spiré ‘ncò ‘nca mi.
 
Son girà ‘l mond sti ùltim temp
e i sì ‘l përchè
montagni lach mar citàj
ma col ch’i ciarcava l’è quì ‘n mezz a viàucc
mataj ch’i sì ‘l mè magon
 
Parlè spjighevi divi tuti ‘l rasoj
la necessità
dla lòta ch’i senti ch’l’è la nòsta
ch’a së combata ‘n tut ël mond,
 
senti che ‘l mé paròli
ì in mè la smenz
‘nt la tèra generosa dël veust cheur
mataj l’è come s’i vivissa
‘nt la vòsta fòrza, ‘nt la vòsta lòta
‘nt ël veust amor për tuti ij gent dël mond
negri biänch e dë tucc ij color. 


 Mila agn ëd Literatura Piemontèisa

Powered by WordPress | Deadline Theme : An Awesem design by Orman