Camillo Brero: Pinin Pacòt e la prima «Companìa dij Brandé»

da gàucia: Pinin Pacòt, Armand Motura, Arrigo Frusta, René Bertolòt, Mario Alban.

An lo dis Pinin Pacòt an col artìcol – prim ëd nòstra Stòria Leteraria – che a nunsia ufissialment e fòra dle muraje ‘d ca la costitussion ëd la «Companìa dij Brandé»: artìcol publicà an sël nùmer 4 – Quart Trimestr dël 1931 ëd la «Rivista Italiana di Letteratura Dialettale – fondata e diretta da Filippo Fichera».

Në scrit andoa dòp d’avej trategià la realtà dla poesìa piemontèisa dla fin ëd l’800 e dël prim ‘900, arciamandse a Alberto Viriglio, Amilcare Solferini, Alfonso Ferrero, Giovanni Gianotti «precursori della moderna poesia piemontese», a evidensia la novità dla poesìa ‘d Nino Costa e a nunsia lë sponté dla neuva giornà poética, con la formassion d’una generassion piemontèisa giovo.

Na generassion ëd «giovo» che dantorn a Pinin Pacòt, con un concet ëd «Poesìa» sensìbil a j’esperiense poétiche neuve a stasìa consolidandse ant una realtà poética dinàmica gonfia ‘d promësse.

Chi a son costi giovo, che «vogliono reagire contro l’andazzo, che, complice il pubblico, asserviva il piemontese alla versificazione delle più insulse spiritosaggini e dei più triti luoghi comuni?».

Chi a son costi giovo che «sentono, poiché hanno fede nella loro lingua, che il piemontese può giungere anche alla rivelazione dei più sottili e dei più alti stati poetici; ma sanno che la poesia non è un riposante gioco di fanciulli maturi, bensì una difficile conquista dello spirito, negata talvolta anche alle più lucide intelligenze ed alle volontà più pertinaci?».

Chi a son costi giovo che «tentano, ognuno secondo il proprio temperamento, di sollevare la poesia piemontese dai bassifondi del vaniloquio verso una più nobile e pura concezione della dignità della Poesia…. verso la quale essi si protendono con la stessa mistica commozione del credente che sta per accogliere nell’anima una soprannaturale presenza… ?».

A l’é inùtil buté an evidensa che coste espression a son, ëdnans a tut, ël propòsit e j’ideaj fondamentaj che a giustìfico e a esalto la poética dl’ànima ‘d Pinin Pacòt. E a l’é për condivide costi prinsipi, che, dantorn a Pinin Pacòt, a son radunasse coj giovo che «usciti insieme dall’ombra, si avviano verso la piena luce».

A l’é Pinin Pacòt che an jë presenta e a-j ciama për nòm:

Teresio Rovere, «che dalla meditazione raccolta e dalla contenplazione trasfigurante sa trarre ritmi larghi e sereni…».
Carlottina Rocco, «così delicatamente femminile… Poesìa, quella della Rocco, tutta abbandonata alla freschezza dell’ispirazione ed esprimente, con un’immediatezza che non esclude l’arte, lo spontaneo fluire di sensazioni squisite e di suggestioni sottili…».
Alfredo Nicola e Armando Mottura «poeti d’amore» … «appassionate anime cittadine, giovane ardente il primo e trasognato e musicale il secondo…».
Renato Bertolotto ed Aldo Daverio, che a j’ero, antlora (i soma ant ël 1931) «due nuove reclute che al loro contatto hanno riconosciuto in sé stessi la sincerità e l’ardore della vocazione…».
Oreste Gallina che «dopo essersi cercato e tormentato componendo in torinese… ritornato al suo rude dialetto delle Langhe canta… quella forte poesia della natura e dell’uomo…».
Luigi Olivero che «…riflette nei suoi versi la sua vibrante anima di giovane fàuno, aperta… a tutti i ritmi della natura e dell’amore…».
Renzo Brero che da la«profonda, intima fonte» ‘d soa prima gioventù lìbera «për ij camp e le caussagne» «egli trae una commossa e chiara poesia».
Ultim ëd costa bela fiorìa ‘d gioventù votà a la «Poesìa» a l’é Nino Autelli, «poeta che non scrive versi, ma che nel suo recente (soma ant ël 1931) volume di leggende e racconti piemontesi, ci ha offerto una schietta poesia popolare che, come il pane del contadino Pan ‘d coa (SELP, Turin 1931) ricco di glutine ha il caldo sapore della terra».

A son costi «giovo», «i giovani poeti piemontesi» che antlora «si son raccolti in un cenacolo dal nome pieno di memorie e di fede, la «Companìa dij Brandé».

«Ij Brandé sono gli alari – a concludìa Pinin Pacòt – Intorno a questi alari spirituali, tra i quali arde la fiamma, essi si raccolgono a riscaldarsi l’anima di poesìa e di fede».
Sòn e parèj a scrivìa, con la data «Torino, Dicembre 1931, Giuseppe Pacotto (Pinin Pacòt)».

A costi nòm as na gionteran tanti d’àutri an coj lontan ani ’30, che travers j’Armanach Piemontèis, publicà a l’Ansëgna dij Brandé, a l’han dàit testimoniansa dla neuva vitalità dla Poesìa Piemontèisa.
An pias arciamé quaidun dij sò nòm che, ant lë spìrit ëd la «Companìa», a l’han anrichì con soa poesìa ël patrimòni ëd nòstra leteratura.
A son, për fërmesse a coj ani: Mario Albano, Carlo Baretti, Giulio Segre, Giovanni Bono, Franco Bertoni e tanti d’àutri ancora; për nen parlé ‘d coj che dòp la sconda guèra mondial a son giontasse e fasse onor coma Arrigo Frusta, Alex (Alessio Alvazzi Delfrate), Elisa Vanoni Castagneri, etc.
Un monument maravijos d’euvre che – comensand da l’euvra ‘d Pinin Pacòt e ‘d Luigi Olivero – a testimònia la pressiosità ‘d nòsra leteratura.

A l’é stàita, forse, na scòla cola ‘d Pinin Pacòt? I diroma, mej, che Pinin Pacòt a l’é stàit n’esempi magistral d’arnovament (coma Luigi Olivero), che a l’ha savù spalanché n’orisont lògich che gnun, prima, a l’é ancalasse a vëdde.
N’orisont luminos, comun al mond ëd la Poesìa e dla Coltura sensa limitassion e sensa compless.

A col orisont a guarda, ancora ancheuj, chi, dla «Companìa dij Brandé, a s’ispira a l’euvra ‘d Pinin Pacòt, pur arnovandse ant le spìrit ant ël rispet ëd l’evolussion dij temp e dl’anrichiment ëd l’ànima dl’òm.

Camillo Brero 
Ij Brandé – Armanach ëd Poesìa piemontèisa | 1994 


 Mila agn ëd Literatura Piemontèisa

Powered by WordPress | Deadline Theme : An Awesem design by Orman