Bianca Barbero

Bianca Barbero con sò òm Gianni.

Bianca Barbero con sò òm Gianni.

Bianca Barbero, nà Bertòld a Caluso,  a l’é na scritris e poetëssa turinèisa d’adoss canavzan-a. Avzinasse a la literatura piemontèisa ant j’agn dla madurità, a l’era fasse conòsse pijand un bel nùmer ëd prémit ant ij concors literari piemontèis e publicand soe euvre ansima Musicalbrandé, Piemontèis Ancheuj e vàire d’àutre arviste. Milo Bre a l’ha nominala ant ël ters volum ëd soa Storia della Letteratura Piemontese dël 1983 ant ël capìtol dla neuva vos feminin-a.

Con lë stranòm ëd Nòna Bianca a l’é stàita l’animatris ëd vàire emission an piemontèis dle radio lìbere ant j’agn ’70 e ’80 dël sécol passà.

A l’é mancà a j’8 ëd magg dël 1998 a 86 agn. Soa biblioteca e le registrassion dij sò antërvent a la radio a son stà donà  a Gioventura Piemontèisa da j’ardité e ancheuj a fan part dël patrimòni dla Biblioteca piemontèisa “Anin Molin Pradel Rabino”.

Rondel dossamer
Bianca Barbero

Ant la sèira sensa stèile
mè magon i pioro al vent…
bruso j’euj sot le parpèile…
pioro, adess, che gnun am sent…

Ant la neuit tant frèida e scura
lassù j’erbo a sfersa ‘l vent;
‘dcò mè cheur a l’ha paura,
mè cheur piora e gnun lo sent.

Ant la sèira sensa stèile
pèisa tant eufre ‘l përdon…
bruso j’euj sot le parpèile…
piora ‘l cheur ël sò magon

ant la sèira sensa stèile.

(da C. Brero, Storia della Letteratura Piemontese, Turin 1983)

Bin ëd sempre
Bianca Barbero

Ancheuj, come nen mai, i l’hai sentù
la bin për la mia tèra, ‘nté i son nà.
I l’hai sentù na canson parlé ‘d gran,
ëd fior e ‘d sol, d’eva ‘d sorgiss e ‘d pra.
Na canson ch’a volava vers ël cel
laudanda costa tèra benedìa.
E mi an chila i l’hai fongà mie man,
l’hai sentume ‘l përfum a gnun ugual,
son anciocame ‘d color, d’amor, seugn…

Ancheuj, come nen mai, i l’hai sentù
che dé la vita për costa mia tèra
l’é mach un rendi lòn che ‘n di a l’ha dame.

(da Sota nòstr cel, Ivreja 1985)


◄ Mila agn ëd Literatura Piemontèisa

Powered by WordPress | Deadline Theme : An Awesem design by Orman