A l’é surtije la prima gramàtica për ij Piemontèis d’Argentin-a

Gramàtica Argentin-a

A l’é staita tuta la gran famija dij piemontèis d’Argentin-a, riunì sota ël capel ëd la FAPA (la federassion dj’associassion piemontèise d’Argentin-a), a avèj cissà l’ëstudi, la dedission e a la finitiva la piuma ëd Nòrma Brarda de Bruno, da Rafaela ant la provinsa ëd Santa Fé, a scrive ël prim utiss dël piemontèis d’Argentin-a, la Gramatica de la Lengua Piamontesa, dont bele-sì ancludoma an Pdf la cuvertin-a, l’achit e quaj feuj ëd l’euvra.

Un test ëd prim livel, destinà a le comunità d’Argentin-a, e però d’anteresse general.

Norma Brarda De Bruno, l'autris ëd la «Gramática de la Lengua Piamontesa»

Norma Brarda De Bruno, l’autris ëd la «Gramática de la Lengua Piamontesa»

Insegnant e peuj diretris ëd na scòla per masnà pcite, adess artirasse, da pì che trant’agn Nòrma Brarda de Bruno a l’é gropà da strèit a j’associassion piemonteise, anans a Piemontesi nel Mondo, adess a l’Union ëd j’Associassion Piemontèise ant ël Mond, dont a l’é Vice-Pressidenta con délega per l’América Latin-a.

Soa Gramàtica, stampà an quai senten-a ëd volum mersì al finansiament dël Munissipi ëd Rafaela, livrà an omage al nùmer sensa fin dj’associassion piemontèise che a esisto an Argentin-a, a ven nen venduva për decision ëd l’ent finansiator: ël lìber, però, a l’é za ruvà an tùit ij canton dël paìs, da Bahia Blanca a Còrdoba, da la capital Buenos Aires a Rio Gallegos.

La Gramàtica ëd Brarda de Bruno, che a seguiss la grafìa normalisà da Pacòt e Viglongh dël 1927 (a tuta mira, giumai, grafìa ufissiala), a treuva soa adoss ant La Grammatica della Lingua Piemontese ëd Bruno Villata, e an d’àutri test gramaticaj.

Le comunità piemontòfone d’Argentin-a a patisso l’età pitòst àuta dij sò parlant, tutun a manco nen ij segnaj ëd n’arnàssita an mes a le generassion pì giovo, argentin ësclint che a guerno l’orgheuj dij sò cé piemontèis.
Al dì d’ancheui as peulo ancora contesse vàire mila parlant ant la Pampa Gringa e an d’àutri anviron d’Argentin-a popolà dai dissendent ëd coj colon che a j’ero ëmnù dal Piemont.

Ij compliment pì anvisch a l’autris Nòrma Brarda de Bruno, al benemérit Munissipi ëd Rafaela e a tuta la FAPA, për la pressiosa argalìa che a l’han vorsuje fé ai parlant piemontèis ëd qualsissìa leu dël mond.

Fabrissi Arnàud
14.5.2016

Powered by WordPress | Deadline Theme : An Awesem design by Orman