Vint agn anans la bataja ‘d Turin ël giovo Vitòrio Amedé a s’arvolgìa a Versailles, pancor inimìa, për confideje a ‘n musicista arnomà la composission ëd na batterie con soa marcia (da bate an sij tamborn e da soné con j’oboé) ch’a valièissa da sigla për ij sò regiment d’ordinansa.
Cost’incombensa a sarà peui assolvùa da Giovanni Battista Lulli, fiorentin franseisisà a la Cort ëd Luis XIV co’l nòm ëd Jean-Baptiste de Lully, che antlora a l’era al màssim dla cariera. Lully a l’avìa componù dun-a le quatr batùe dla batërìa e peui, na vòta che coste a j’ero stàite agradìe da Turin, le sinch arie ‘d compagnament dj’oboé. Parèj l’invension d’un cortisan dël Rè Sol a l’é vnùita esse la marca sonora dla part pì gorëgna dl’armèja ‘d Soa Autëssa, costituì dai regiment Vardie, Savòja e Piemont, visadì ‘l signal ëd cola ch’a së s-ciamava La Generala. Costa a rolava a minca vent ëd guèra, a nunsiava la mobilitassion general an cola stagion che, da la dërota dë Stafarda (1690) a le vitòrie ‘d Turin (1706) e dl’Assieta (1747) a l’avrìa portà a l’emancipassion ëd Piemont-Savòja da la Fransa.
Bin che l’ideja ‘d nassion a sia ancheuj diferenta rëspet al sentiment d’apartenensa a na Comunità dantorn al 1685, época ‘d composission ëd l’Imn, costa a l’é la mùsica la pì antica ‘d nòsta tradission che, a nòstr avis, a l’é evocatriss, an tan che arcòrd ëstòrich e d’afession, d’un sentiment nassional piemontèis-savojengh ch’a l’era già nòstr antlora e che noi i sentoma nòstr ancheuj.
Për sòn Gioventura Piemontèisa a la andòta an tan che propòsta për l’Imn Nassional piemontèis, e parèj a la arconòss, anvidand ij Piemontèis a prové a arconòss-se e peui a arconòssla.

Adatament da G. Bonino, Repertorio di musiche del tempo di Luigi XIV in uso presso unità militari partecipanti all’assedio e alla battaglia di Torino del 1706, an Torino 1706, memorie e attualità etc., Atti del Convegno, Torino 20 e 30.9.2006, Vol. I, Torino 2007. Consulensa stòrica: Associazione per la valorizzazione della Storia e tradizione del vecchio Piemonte. Deliberassion dël Consèj ëd Gioventura Piemontèisa, a Turin a j’8 ëd Fërvé dël 2009.
A l’é già provedusse, an sla base djë spartì dl’época, a fé eseguì le trascrission e j’arangiament për j’esecussion ant le vàire formassion musicaj.

La propòsta d’andoté la Marche de Savoye coma imn ëd la Region Piemont a l’é stàita presentà a j’autorità regionaj ai 9 ëd luj dël 2009.

Scoté la Marche de Savoye