Gioventura Piemontèisa a l’é nassùa dël 1994 për concore a goerné e promeuve l’identità piemontèisa e soa lenga, an manera moderna, dinàmica e duverta. Propòsit ch’a cudiss con la fòrsa dla certëssa ‘d travajé për rësponde a në bzògn ch’an riva ‘dcò da l’época stòrica ch’i soma an camin a vive, dagià che ‘n mond na vira pì cit e “globalisà” a ciama l’esigensa ‘d rèis goregne. E conòsse le rèis a buta le fondamente për un confront fosonant antra ‘d colture diferente. Për sòn Gioventura Piemontèisa a travaja ant ël contest ëd n’interscambi costant con j’àutre colture italian-e e europenghe.

Gioventura Piemontèisa a l’é fasse armarché për soe capacità progetuaj e për soa bondosa atività editorial e didàtica. An sl’andi ‘d cost angage ël Moviment a l’ha ideà e realisà ‘l prim programa coordinà për l’insegnament ëd la lenga piemontèisa ant le scòle (Programa Arbut); për sostnilo a organisa da vàire ani ‘d cors ëd piemontèis an tut ël Piemont, a pùblica ‘d lìber, a organisa ‘d rassegne teatraj e a cissa la produssion coltural an lenga piemontèisa.

A l’é stàita considerèivola soa contribussion për ël dësvlup ëd na polìtica linguìstica an Piemont e për l’arconossiment ufissial ëd la lenga piemontèisa che, dal 1999, a l’é la “lenga regional dël Piemont”.

Never underestimate the importance of local knowledge: mai sotëstimé l’importansa dle conossense locaj. E la lenga a l’é ‘l bin pì pressios ëd na coltura, dont a-j riva tuta la resta.

_____________________________________

La quòta associativa për ël 2009 a l’è ‘d 20 Euro, da versé an sël ccp 95760369, antestà a Gioventura Piemontèisa - Via San Secondo 7 bis, 10128 Torino.