L’órdin dël Di proponù da Gioventura Piemontèisa për ufissialisé la lenga piemontèisa

COMUNICÀ

N’àutr arzultà amportant portà da la Prima Manifestassion për ël Piemontèis ufissial dij 26 d’otóber

AN CONSEJ REGIONAL MAGIORANSA E OPOSISSION A SOTSIGNO L’ÓRDIN DËL DI PROPONÙ DA GIOVENTURA PIEMONTÈISA PËR UFISSIALISÉ LA LENGA PIEMONTÈISA

La 1a Manifestassion për ël Piemontèis ufissial ch’a l’é fasse an facia a la Sede dël Consej Regional dël Piemont a Turin ai 26 d’otóber passà a l’ha portà a n’àutr arzultà ch’a slarga le pòrte a na speransa për l’avnì dla lenga piemontèisa.
La Manifestassion a l’era concludusse con la consëgna ‘d na propòsta d’Órdin dël Di al Consej Regional – da part ëd Gioventura Piemontèisa (a l’han aderì a la Manifestassion ëdcò l’Associassion Coltural Piemontèisa ‘d Rafaela, Piemont Dev Vive, ël Sènter dë Studi Don Minzoni-Piemontèis Ancheuj e la Familia Piemontesa de Arroyito) a tuti ij Grup polìtich dël Consèj, con l’anvit a dëscutlo e a aprovelo, dëdlà dle posission ëd partì.
Ant ij di apress na delegassion ëd Gioventura Piemontèisa a l’é peui stàita arseivùa da la Pressidensa dël Consej e, an cola ocasion, a l’ha avù ancor na vira la possibilità d’arcomandé ‘l rëspet dij drit linguìstich dij Piemontèis.

Ancheuj, 17 ëd novèmber, col Órdin dël Di a l’é stàit presentà con la firma dël vice-pressident dël Grup regional ëd la Lega Nord, Michele Marinello, e dla consijera dël PD Angela Motta.
Ël document, che tòst a sarà portà an àula për la votassion, a ciama ‘d passé dëdlà dla discriminassion che da pì ‘d des ani a patiss la lenga piemontèisa – lassà fòra sensa gnun sust da la legislassion a tùa dle minoranse linguìstiche – angagiand la Region a antërven-e apreu dël Govern e dël Parlament përchè ch’a sio mandà an dëscussion le propòste ‘d lej ch’a ciamo la parificassion dël piemontèis a j’àutre lenghe minoritarie: a-i na j’é tre, tute elaborà da Gioventura Piemontèisa, an Senat (prima sotsignataria la Sen. Mirella Giai), a la Cambra (prim sotsignatari l’On. Gianni Vernetti) e an Region (prima sotsignataria la Cons. Angela Motta).

Nòstr piasì a l’é col ëd pijé at che, dantorn a n’arcesta sì pressanta e fondamental për l’avnì ‘d Piemont, l’acòrdi a passa oltra j’ideje polìtiche e la Region Piemont a s’anviara a presentesse unìa an su cost argoment.
Dëdlà dle polémiche dësdeuite e dle speculassion ëstrumentaj ch’a duro pòchi di, ant ël concret a l’é giust fé armarché l’utilità d’inissiative portà anans con corage e determinassion për fé sente ciàira e fòrta la vos ëd la lenga piemontèisa ch’a reclama ij sò drit sachërsant.
Antratan ch’a armersia ancor na vira ij sò militant e j’associassion ch’a l’han aderì a la Manifestassion, ël Moviment Gioventura Piemontèisa a peul nen fé che auguresse sempe pì ‘d colaborassion ëdcò da j’associassion ch’a l’han nen partessipà e che costa inissiativa a sia la primalba ‘d na neuva consiensa ‘d tuti nòsti rapresentant polìtich.

Powered by WordPress | Deadline Theme : An Awesem design by Orman