14 d’aost 2011. 50 an d’Escolo dòu Po

14 agosto 1961: Gustavo Buratti, piemontese, fondò l’associazione che nobilitò la lingua provenzale

domenica 28 agosto 2011, ore 15

Sancto Lucìo de Coumboscuro (Val Grana – CN)

Da pàira con Lou Roumiage de Setembre, ch’a pòrta tanti roumé, musicant e artista a nòsta mnùa ruà (ëst’ani as fa ’l saba 27 e la dumìnica 28 d’aost), l’organisassion Coumboscuro Centre Prouvençal a masenta – pagnà e al midem temp che le danse e jë spetàcoj da fòra – doi rëscontr, dont ël prim (saba 27) a l’é ampivotà an sël sugèt ëd le “patrie” che pa sempe a son angualà con ij “finagi” e lë scond (dumìnica 28) an sij sinquant’ani dla Escolo dòu Po, l’assossiassion poética-culturala stabilìa dzortut mersì al sovagn e l’oeuvra ’d sensibilisassion ëd nòss tant vajant e mai dësmentià Tavo Burat.

I arcordoma a tuti ch’ij prim tre Cabiscòu (rësior) ëd sa companìa, butà su a specc e arbomb dij Felibrige provençaj e dij Brandé piemontèis, a son ëstàit Pinin Pacòt, Corrado Grassi e Giuliano Gasca-Queirazza.

Dazà che la presensa dij provensaj e di franch-provensaj a sarà sens’àut armarcanta (an tra j’àuti i-j sarà Sergio Arneodo, l’ùltim poeta ’d costa scòla, e sòci fondator), i l’hai pensà dë spataré l’anvit cò a nòssa gròssa famija piemontèisa, ch’a l’ha avù na part aussì bondosa ant la fondassion ëd sa companìa e an arcòrd ëd nòssi pì fiamengh poeta e savan ch’an meud tant cissant a l’han pijaje part.

Për coj e cole ch’a podran onorene ’d soa presensa, ël randevò a l’é Coumboscuro për 3 bòt dël dòp-disnà, dumìnica, ël 28 d’aost. As capiss ch’i séves pì che bin-ëvnù/e cò al randevò dël di anans, midema ora, midem pòst, për ël rëscontr an su patrie e finagi.

A l’é possìbil che për tròp va e ven a saro la val d’an àut a le viture ma, cmè ch’a l’han fàit minch’ani pr’anans, a-i sarà na navëtta minca 10-15 minute ch’av rabaja d’andova ch’i l’éves chità vòssa vitura (an brova dla stra) për scarosseve fin-a al salon ëd le conferense a Coumboscuro.

Ciapé su, donca, e dene na man për feje vëdde a nòss amis provensaj e franch-provensaj che lë spìrit ëd Tavo Burat, ch’a l’arserca dle pajëtte d’òr a l’ha siassà an Lambrëtta un-a pr’un-a tute ste valade, a l’é nen dëstiss e ëmnì a la comemorassion ch’a l’arcòrda e a l’onora.

Vòss,
Sergi Girardin, Sènter Filològich ëd Coumboscuro

Sì-tacà i trovreve la crìa dij rëscontr e n’artìcol ëd Tavo.

Powered by WordPress | Deadline Theme : An Awesem design by Orman