«Piemontèis Ufissial!»: i l’oma passà le 10.000 signature

La petission popolar “Piemontèis ufissial!” a l’ha pijà la scampa an passand le 10.000 sotëscrission.

Sa petission, dëdlà ‘d ciamé dun-a la dëscussion ëd le vàire propòste ‘d lej deposità da ‘mpess, a-j ciama a la Region Piemont ëd desse da fé “apreu ‘d tute j’institussion afin ch’a chita la discriminassion contra la lenga piemontèisa e che costa a peussa avèj ij vantagi dl’arconossiment dij drit costitussionaj arzervà a le lenghe minoritarie dla Repùblica italian-a”, tant për ancaminé an giontand ël piemontèis ant la Lej 482/99.
Costa inissiativa a ven apress la manifestassion dij 26 d’otóber passà (vëdde la galarìa fotogràfica) cand, an facia al Consej regional, ij Piemontèis a l’avìo ciamaje a la Region ëd fé rispeté sò  drit fondamental a la lenga e a l’identità.
A ven a taj memorié che la particolarità dla lenga piemontèisa a l’é ben armarcà dai filòlogh ij pì avosà dj’Università ‘d tut ël mond e che ‘l piemontèis a l’é arconossù an tan che “lenga autònoma” da l’UNESCO e dal Consej ëd l’Europa (za dël 1966 a l’Università d’Harvard ël professor Einar Haugen, un dij pì grand sociolinguista ‘d sèmper, a fortìa esse ‘l piemontèis, “da tute le mire linguìstiche na lenga separà da cola italian-a da na banda e da cola fransèisa da l’àutra”).
Comben ch’i sio rivà al but la cujìa dle signature a va anans, séguit a le solecitassion ch’a rivo da tute le provinse piemontèise.
Le prime 10.000 signature i-j armëttroma a la Region ant ij di ch’a vniran.


ANFORMASSION: 328 1292172 – 329 6864261 – giovpiem@yahoo.it

IJ RANDEVÒ PËR LA CUJÌA DLE SIGNATURE

“La lòta antra ‘d grup dominant e ‘d grup dominà për ël drit a survive a conten lòn che mi i ciam “l’ecologìa dla lenga”. Con s’espression i veuj dì che goerné la lenga a fà part ëd l’ecologìa uman-a.”
Einar Haugen (1906 – 1994)

Powered by WordPress | Deadline Theme : An Awesem design by Orman